Pacolli vazhdon turneun lobues në Afrikë

Në vazhdim të turneut lobues në kontinentin afrikan, zëvendëskryeministri i parë i Qeverisë së Republikës së Kosovës, Behgjet Pacolli, të hënën në mbrëmje ka qëndruar në Kenia ku është pritur në një darkë zyrtare nga kryeministri i këtij shteti, z. Raila Odinga.

Zëvendëskryeministri Pacolli, ka diskutuar me Odinga për zhvillimet politikë në Kosovë dhe procesin e njohjes së Republikës së Kosovës nga vendet Afrikane.

Pacolli, ka kërkuar nga kryeministri Odinga shqyrtimin e njohjes së Republikës së Kosovës, nga Kenia, në një periudhë sa më të shpejtë.

Sipas agjendës, turneu lobues i zëvendëskryeministrit Pacolli, sot në mëngjes ka vazhduar në shtetin e Togos, ku do të zhvillojë takime me autoritetet e larta të këtij vendi, ndërsa pasdite, zëvendëskryeministri Pacolli do të udhëtojë në Mali.

Zëvendëskryeministri Pacolli, ka uruar zonjën Dlamini-Zuma për zgjedhjen në krye të Unionit të vendeve Afrikane

Ai, gjatë qëndrimit në Adis Abeba të Etiopisë, ku është mbajtuar mbledhja e Unionit të vendeve Afrikane, ka shfrytëzuar rastin që të urojë zonjën Nkosazana Dlamini- Zuma për zgjedhjen në krye të Unionit të Vendeve Afrikane.

Gjithashtu, nëpërmjet një letre zyrtare dërguar asaj, zëvendëskryeministri Pacolli, ka shprehur bindjen e tij se me ardhjen e zonjës Zuma në krye të Unionit të vendeve Afrikane, Republikës së Kosovës do ti ofrohet bashkëpunim, në përkushtimin për të ndërtuar raporte diplomatike me vendet anëtare të kësaj organizate.