Paditë për nxjerrje sekreti dhe një rast nga Turqia

Lexova në internet një debat për një padi që Prokuroria u ka bërë tre gazetarëve, mes të cilëve edhe redaksisë suaj për publikimet mbi Gërdecin, duke ju akuzuar për “nxjerrje të sekreteve”.

Këto më duken lëvizje sa për të thënë, sepse është e qartë që media ka detyrën të publikojë informacionin që i intereson publikut dhe Prokuroria ta ruajë informacionin, nëse e ka klasifikuar sekret.

Po ju jap një shembull nga këtu ku jetoj, në Turqi. Një gazetë e vogël, por mjaft e gjallë, ka vënë në shënjestër institucionet, duke lëkundur praktikën e zakonshme të heshtjes në mediat turke. Gazeta “Taraf”, e cila ka burime të shumta informimi brenda ushtrisë turke, ka publikuar artikuj të njëpasnjëshëm sensacionalë, ku demaskohet ndërhyrja e ushtrisë në politikë. Por, gazeta vazhdon të përballet me presione ligjore dhe politike.

Bordi i kryeredaktorëve të gazetës “Taraf”, po diskuton mbi kërcënimin e fundit për ndjekje penale ndaj tyre nga forcat e armatosura turke. Ky kërcënim vjen pas një publikimi të dokumenteve sekrete, në të cilët akuzohet ushtria për neglizhencë në rastin e vrasjes së 17 ushtarëve turq nga një sulm i separatistëve kurdë, pranë kufirit me Irakun.

Zëvendëskryeredaktorja, Jasmin Congar, paralajmëron se gazeta mund të bastiset në çdo moment. Por redaktorët thonë se do të vazhdojnë punën, pavarësisht nga kërcënimet.