Pahor: Të bëhet çdo gjë për suksesin e samitit ballkanik

Kryeministri i Sllovenisë, Borut Pahor, është nisur sot për në Bruksel, në përpjekje për ta shpëtuar samitin BE-Ballkani, që mbahet këtë fundjavë, por që është vënë në paqartësi për shkak të mospajtimeve ndërmjet Kosovës e Serbisë.
"Do të bëj çdo gjë të domosdoshme për suksesin e konferencës", u tha gazetarëve Borut Pahor, para udhëtimit të tij për në Bruksel për ta takuar presidentin e BE-së, Herman Van Rompi.
Zoti Pahor e ka konfirmuar takimin e tij të mbrëmshëm me presidentin e Serbisë, Boris Tadiç, në Beograd, për këtë çështje, dhe ka paralajmëruar se ndoshta do t'i vizitoj edhe vendet e tjera ballkanike për t'i bindur ato, që të marrin pjesë në samitin e organizuar nga Sllovenia dhe Kroacia.
Ai pranoi se "kemi të bëjmë me një vëllim të madh të problemeve, të cilat deri tash nuk ia doli t'i zgjidhë askush".