Parada gay, Berisha: Spahiu, jo përgjigje mbretërore

Kryeministri Berisha e ka cilësuar deklaratën e Zv.ministrit të mbrojtjes Ekrem Spahiu për zhvillimin e paradës së homoseksualëve në Tiranë si përgjigje aspak mbretërore.
 

Duke folur në mbledhjen e grupit të PD-së, Berisha theksoi se Tirana është qytet i tolerancës dhe Shqipëria vend i lirive të garantuara.
 

"Orientimi seksual është një realitet sa vetë lashtësia, realitet që ekziston pavarësisht nga besimet apo bindjet politike. Tirana është një qytet i tolerancë dhe i qëndrimeve të garantuara” ka theksuar Berisha ndërsa ka shtuar se pavarësisht asaj që kanë thënë aleatët e tij, asnjë parti nuk ka dajakun në platformë.

Ai ka theksuar se në asnjë rrethanë nuk ka çështje që mund të pranohet intolerancë. “Ky është një vend i lirë ku njerëzit duhet ta ndiejnë veten të lirë me qëndrime dhe bindje të ndryshme të përcaktuara në kuadrin ligjor të vendit” ka shtuar më tej Berisha.