“Partneritet të plotë me projektet reformatore të administratës ‘Basha’”

Kreu i prezencës së OSBE në Tiranë Eugen Wollfarth takon kreun e bashkisë së Tiranës Lulzim Basha

Kreu i prezencës së OSBE në Tiranë Eugen Wollfarth ka kërkuar nga kreu i bashkisë së Tiranës Lulzim Basha që lejet e ndërtimit të jenë sa më transparente.
“Një aspekt i diskutimit tonë ishte dhënia e lejeve, e cila do të jetë një proces transparent dhe i garantuar. Ky është një aspekt që duhet të kryhet, në përputhje me ligjin dhe është një nga fushat ku do të vazhdojë bashkëpunimi i OSBE-së me Bashkinë e Tiranës”, theksoi Basha.
Në takimin e zhvilluar në Bashki u diskutua dhe mbi planin rregullues të kryeqytetit dhe projektet e tjera të bashkisë. Kryebashkiaku Basha, informoi ambasadorin Wollfarth mbi zhvillimet në Bashkinë e Tiranës dhe projektet zhvillimore të qytetit, si Plani Urbanistik, ndërhyrjet në infrastrukturë dhe çështjet e mjedisit.
“Fusha e përparësisë së bashkëpunimit me OSBE-në janë mbetjet, trajtimi i tyre dhe në tërësi çështjet e mjedisit që kanë të bëjnë me planifikimin e sipërfaqeve të gjelbra të mëdha, krijimin e një parku të ri, ndërhyrje për gjelbërim në çdo lagje të Tiranës, lehtësimi i trafikut nga sheshi ‘Skënderbej’ deri te rreth rrotullimi i doganës”, nënvizoi kreu i bashkisë së Tiranës.
Ambasadori i OSBE-së, Eugen Wollfarth, tha se ky bashkëpunim sheh të nevojshëm përfshirjen e shoqërisë civile dhe ndërgjegjësimin e qytetarëve për çështjet mjedisore dhe do të kontribuojë në cilësinë e jetesës në vend. Ndërkohë duke ju përgjigjur interesit të gazetarëve mbi deklaratat e bëra nga lideri i opozitës Edi Rama i cili është shprehur se nuk do t’i miratojë ligjet me 3/5, duke i cilësuar vetëm si shtojca, Ëollfarth deklaroi: “Konsultimi është gjithnjë i rëndësishëm dhe pata përshtypjen se Kryebashkiaku i Tiranës është i hapur për një gjë të tillë dhe nuk është e limituar politikisht, pasi është e hapur për shoqërinë civile. Kjo është e vërtetë, që duhet në nivel kombëtar por edhe për atë lokal dhe është e rëndësishme që duhet të kontribuojnë, mund të kontribuojnë dhe zërat e të gjithëve të dëgjohen. Idetë e tyre, jam i më se i sigurt dhe i bindur që do të jenë pjesë e projekteve të ardhshme për qytetin”, deklaroi kreu i prezencës së OSBE-së në vendin tonë, Eugen Wollfarth.