“Për liberalizimin e vizave, ju po trokisni në dyer të hapura”

Kryetarja e Kuvendit Jozefina Topalli merr garancinë e Hungarisë për proceset e integrimit të Shqipërisë në BE

TIRANE – Kryetarja e Parlamentit Jozefina Topalli ka marrë pjesë në një konferencë ku merrni pjesë katërt rajonale të Kryetarëve të parlamenteve të Ballkanit Perëndimor, ku mori dhe mbështetjen e Hungarisë për liberalizimin e vizave Shqipëri-BE. “Integrimi i Shqipërisë dhe i Ballkanit Perëndimor në BE është i rëndësishëm për ju por edhe për vetë BE-në,”u shpreh Kryetari i Parlamentit të Hungarisë, Bela Katona gjatë konferencës së katërt rajonale të Kryetarëve të parlamenteve të Ballkanit Perëndimor “Bashkëpunimi me NATO-n dhe procesi i integrimit në BE i vendeve të Ballkanit Perëndimor”, zhvilluar në Budapest. Hungaria, vendi i cili pas një viti merr presidencën e radhës së BE-së, një avokate e proceseve integruese të Ballkanit Perëndimor, e para që ratifikoi protokollin e anëtarësimit të Shqipërisë në NATO, ndër të parat që ratifikoi MSA-në, organizoi këtë konferencë si dëshmi e vijimit të mbështetjes së saj për këtë rajon.
Në këtë konferencë u theksua se “anëtarësimi i Shqipërisë dhe  Kroacisë në NATO ka sjellë një ndryshim të thellë në strukturimin e sigurisë së rajonit, si edhe të vetë Aleancës, por puna në Ballkanin Perëndimor ende nuk ka përfunduar”.
Duke vazhduar më tëj që përshpejtimi i integrimit të këtij rajoni në strukturat Euro-Atlantike është i rëndësishëm jo vetëm për rajonin, por edhe për vetë Bashkimin Evropian dhe NATO-n.
Një nga fjalimet kryesore të konferencë ishte fjalimi i Kryetares së Kuvendit të Shqipërisë, Jozefina Topalli, e cila për të solli përvojën dhe modelin e Shqipërisë në anëtarësimin në NATO dhe ecjen e shpejtë drejt integrimit evropian. Prioritetet e mandatit të ri, veçanërisht të politikës së jashtme, liberalizimi i vizave dhe integrimi në BE, ishin fokusi i fjalës që Kryetarja e Kuvendit mbajti përpara homologëve të Hungarisë, Kroacisë, Maqedonisë, Malit të zi, Bosnjë-Hercegovinës, Serbisë e Vojvodinës.
Topalli theksoi se “Shqipëria, si një vend anëtare e NATO-s do të vazhdojë t’i konsiderojë me prioritet  marrëdhëniet me vendet e rajonit, duke punuar për forcimin e bashkëpunimit politik, ekonomik e social me synimin e qartë të anëtarësimit në BE”.
Duke u ndalur veçanërisht te Kosova, Kryetarja e Kuvendit  tha se “Shqipëria do të vijojë mbështetjen e fuqishme për njohjen e pavarësisë së saj dhe anëtarësimin në OKB e organizata të tjera ndërkombëtare, duke shtuar bindjen se Kosova do të jetë e pranishme së shpejti edhe në tryeza të tilla rajonale”.
Avokatinë e Hungarisë për integrimin e Shqipërisë në BE, Kryetari i ri i Parlamentit të Hungarisë Bela Katona ia konfirmoi Kryetares së Kuvendit edhe në takimin e veçantë të rezervuar.
“Për liberalizimin e vizave, ju po trokisni në dyer të hapura” tha ai, duke siguruar jo vetëm mbështetjen e Hungarisë si vend i BE-së, por edhe influencën në vende të tjera evropiane për përshpejtimin e anëtarësimit të Shqipërisë në Bashkimin Evropian
“Ne do të lobojmë për ju,” theksoi Kryetari Katona, duke shtuar se marrëdhëniet e shkëlqyera mes Hungarisë dhe Shqipërisë do të ndikojë në muajt shumë të rëndësishëm të presidencës hungareze të BE-së pas një viti.
Katona nënvizoi se edhe gjatë periudhës deri në marrjen e presidencës, Hungaria do të jetë një ombrellë mbrojtëse për Ballkanin Perëndimor dhe do të përdorë të gjithë potencialin e saj politik e diplomatik për anëtarësimin sa më të shpejtë të këtij rajoni.
Për Kryetaren e Kuvendit kjo mbështetje e vazhdueshme e Hungarisë, si për anëtarësimin në NATO, por edhe në rrugën drejt BE-së, ka një vlerë shumë të rëndësishme në arritjen e ambicieve integruese të Shqipërisë. Kryetari Katona tha se, “Hungaria e kupton më së miri domosdoshmërinë e anëtarësimit të Shqipërisë në familjen ku i takon të jetë, e veçanërisht do të mbështesë fuqimisht liberalizimin e vizave për një vend që ka vuajtur një kohë të gjatë në izolim”.
Kryetarja e Kuvendit shprehu mirënjohjen për organizimin e konferencës rajonale në Budapest, e cila u karakterizua nga përgjegjshmëria, maturia dhe fryma e fortë e bashkëpunimit mes vendeve të rajonit për të bashkërenduar politikat e për të nxitur vendet e Bashkimit Evropian të fokusojnë vëmendjen te anëtarësimi i këtij rajoni.