Përkujtohet komandanti Ilaz Kodra
Rruga e lirisë që trasuan dëshmorët duhet të shërbejë në forcimin e unitetit të gjithë spektrit politik kosovar, me qëllim të ndërtimit të shtetit sovran e të pavarur të Kosovës, ashtu siç e deshën dëshmorët, u tha në akademinë përkujtimore kushtuar komandantit të UÇK-së, Ilaz Kodra.
Të premten nën përkujdesjen e Qeverisë së Kosovës, në Teatrin Kombëtar u mbajt një akademi përkujtimore për dëshmorin Ilaz Kodra, në 12-vjetorin e rënies heroike.
Ministri i Forcës së Sigurisë, Agim Çeku, duke kujtuar rënien heroike të komandant Kodrës, ka thënë se vitet që kaluan nga rënia e tij, ia kanë shtuar lavdinë më shumë veprës së tij. Ai theksoi se duke nderuar jetën dhe kontributin e Kodrës, nderohen gjithë luftëtarët e Brigadës 114 të UÇK-së.
“Kjo brigadë është unike edhe për një fakt, se nga radhët e saj, në krye të detyrës ranë dy prej komandantëve më të denjë të Ushtrisë Çlirimtare të Kosovës, Fehmi Lladrovci dhe Ilaz Kodra”, ka thënë Çeku.
Ai ka thënë se me emrin e komandantëve Fehmi Lladrovci dhe Ilaz Kodra do të shkruhej njëri nga kapitujt më të ndritshëm të historisë “rënia e komandantëve në vijat e para të frontit”.
“Një popull nuk e bën të madh numri i popullsisë, apo hapësira e territorit që e ka, një popull e bëjnë të madh dëshmorët, heronjtë që i ka, historia që e ka, vlerat që i ka. Ne jemi popull i madh, i kemi të gjitha”, tha Çeku.
Kryetari i Shoqatës së Veteranëve të UÇK-së, Muharrem Xhemaili duke kujtuar periudhat e vështira dhe dëshpëruese që kalonte kombi shqiptar në Kosovë, ka thënë se shpresa e lirisë u ringjall në Prekazin Legjendar të Adem Jasharit.
“I gjetur në një okupim të egër disa dekadash, populli i Kosovës kishte mbetur populli i fundit i robëruar në Evropë, pa asnjë të drejtë elementare, duke u terrorizuar çdo ditë nga sistemi vrastar jugosllav, por pranvera e vitit 1998 ia riktheu kombit shqiptar shkëlqimin, duke filluar lavdishëm me Prekazin legjendar të Adem Jasharit, për të përhapur shkëndijat anekënd Kosovës”, ka thënë Xhemaili.
Ndërsa vajza e dëshmorit, Sumeja Kodra theksoi se në përkujtimet për dëshmorët, ngjallën edhe më shumë kujtimet për veprat madhështore, heroizmin, sakrificën dhe vetëflijimin e dëshmorëve në shërbim të lirisë së atdheut.
“Kjo rrugë e lirisë që na trasuan dëshmorët, çdoherë duhet të na shërbejë në forcimin e unitetit të gjithë spektrit politik kosovar, me qëllimit të ndërtimit të shtetit sovran e të pavarur të Kosovës, ashtu siç e dëshiruan dëshmorët”, ka thënë Kodra.
Ilaz Kodra u lind në Prekaz të Skenderajt. Që nga vitet e 90-ta i ishte bashkuar grupit të armatosur të Komandantit Legjendar të Ushtrisë Çlirimtare të Kosovës. Pas rënies së komandantit të parë të Brigadës 114 të UÇK-së, Fehmi Lladrofci, emërohet komandant, i cili e udhëhoqi brigadën me krenari deri më 30 prill 1999, kur bie heroikisht në një betejë përball armikut, derisa mbronte popullatën civile në fshatin Verboc të Drenasit. (Kosovapress)