Përmet, koalicioni “Aleanca për Qytetarin” prezanton Kujtim Hoxhën

PËRMET Koalicioni “Aleanca për qytetarin” prezantoi dje në Përmet kandidatin për kryetar bashkie, Kujtim Hoxha, përfaqësues i LSI-së. Në prezantimin e kandidatit të mazhorancës ishte i pranishëm Kryetari i LSI-së, Ilir Meta, deputetët e qarkut Genc

Ruli dhe Vangjel Tavo, si dhe drejtues të tjerë të partive pjesë e këtij koalicioni. Kryetari i LSI-së, Ilir Meta, deklaroi dje se kandidatura e Hoxhës do të justifikojë besimin e të gjithëve. “Ne e dimë se të gjithë kanë dëshirë të kandidojnë, jo thjesht për karrierë personale, por edhe për të bërë diçka më shumë për qytetin e tyre, për komunitetin e tyre. Megjithatë, unë dua të siguroj të gjithë qytetarët e Përmetit se kandidatura, e cila tashmë është e të gjithë “Aleancës për Qytetarin”, pra kandidatura shumë e nderuar e Kujtim Hoxhës, na jep një mundësi që jo vetëm të bashkohemi për të fituar, por edhe të bashkëqeverisim me qytetarë, me transparencë Bashkinë e Përmetit, në mënyrë që ky qytet dhe banorët e tij të hedhin hapa më të sigurt në të ardhmen, në përmirësim të jetës së tyre, të shërbimeve ndaj tyre, të mirëqenies në luftën kundër varfërisë, e cila duhet të vazhdojë, në mundësitë në rritje për të shtuar punësimet përmes bashkëpunimit më të ngushtë të Bashkisë me qeverinë por dhe sipërmarrjet private”, tha Meta.