Përurohet Vërmicë-Merdar, i ftuar edhe Berisha

Ne ceremonine e perurimit te 38 kilometrave te para te autostrades Vërmicë- Merdar pritet te marre pjese edhe kryeministri Sali Berisha. Ai eshte ftuar nga homologu i Kosoves, Hashim Thaçi për të qene pjese e ceremonise.

Ministri i Infrastrukturës së Kosovës, Fehmi Mujota, në konferencën e nje dite me pare prezantoi parapërgatitjet rreth përurimit të pjesës së parë të autostradës Vërmicë-Merdar, në gjatësi prej 38 kilometrave, ku ftoi qytetarët e vendit që të marrin pjesë në përurim.

Do të jetë një ditë e shënuar për Republikën e Kosovës, është një e arritur shumë e madhe në historinë e ndërtimit të Kosovës, tha Mujota, i cili shfrytëzoi rastin për të falënderuar të gjithë qytetarët e Kosovës, e veçmas të asaj pjese ku tashmë ka përfunduar ndërtimi i këtij segmenti, për siç u shpreh ai, bashkëpunim të shkëlqyeshëm. Mujota shprehu falënderime edhe për autoritetet lokale për kontributin e dhënë në zgjidhjen e  problemeve të ndryshme, si dhe firmën ndërtuese.

Ministri Mujota konfirmoi se autoriteti mbikëqyrës i autostradës ka certifikuar të gjitha punimet, gjë që dëshmon se punimet janë kryer sipas standardeve evropiane të ndërtimit.

Gjatë kësaj konference, Mujota bëri të ditur se Ministria e Infrastrukturës do të vazhdojë fuqishëm me ndërtimin e segmenteve tjera të kësaj rruge, si dhe shprehu bindjen e plotë se do të punohen edhe segmentet tjera pa ndërprerje, pasi që tanimë janë bërë të gjitha përgatitjet si në aspektin buxhetor gjithashtu edhe në atë profesional. (kohaditore)