Pika e dobët e Messit, penalltitë

Lionel Messi është aktualisht futbollisti më i mirë në botë. Por, nëse ekziston një fushë në të cilën ai duhet të përmirësohet, atëherë ajo është ekzekutimi i penalltive. Ylli argjentinas dështoi të realizojë nga 11-metërshi në minutat shtesë të barazimit 0-0 me Sevillan të shtunën mbrëma në Nou Camp.

Kjo nuk paraqet risi për sulmuesin e gjigantit katalan, i cili ka dështuar të realizojë në gjashtë nga 22 penalltitë që ka ekzekutuar për kampionin aktual të La Ligas. Portieri i Sevillas, Javi Varas priti penalltinë e Messit e më pas tha: “E kam ditur se ku do të godasë, i kam studiuar goditjet e tij”.

Varas së bashku me trajnerin e portierëve të Sevillas, Javi Garcia kishte studiuar të gjitha 21 penalltitë e Messit para ndeshjes së tyre të shtunën. Ata mësuan një fakt interesant: argjentinasi kishte goditur në të djathtën e tij në 15 nga 21 tentime, përfshirë shtatë nga tetë të fundit.

Këtë sezon, Messi dhe Barcelona janë ankuar se kërkesat e tyre për penallti janë duke u refuzuar. Është ndoshta ironike që kur ato të akordohen, Messi të dështojë të shënojë. 24 vjeçari ka vetëm 72 për qind të saktësisë nga pika e bardhë. Për një ekip si Barcelona dhe një futbollist si Messi, kjo nuk është e mjaftueshme. Andaj, Messi ka gjetur diçka për të përmirësuar.