Pirro Çako zgjidhet kreu i ri i "Albautor"-it
Alma Mile
Kantautori Pirro Çako u zgjodh dje, kryetari i ri i Agjencisë së administrimit kolektiv të së Drejtës së Autorit për muzikën dhe regjistrimet mekanike, "Albautor". Ditën e mërkurë, pas 18 vjetësh, që nga krijimi i kësaj agjencie, u mblodh asambleja e artistëve. Përveçse u bë një analizë të veprimtarisë në këto dy dekada, u zhvilluan edhe zgjedhjet për kryesinë e re të agjencisë. Mes gjithë kandidaturave të paraqitura nga fushat e muzikës së lehtë, klasike dhe poezia, në këshillin e ri administrativ u zgjodhën Shpëtim Saraçi, Pirro Çako, Vasil Tole, Nestor Kraja e Jorgo Papingji. Ndërsa dje u zhvillua raundi i dytë i zgjedhjeve, ku mes anëtarëve të rinj të këshillit u zgjodh kryetari. Me shumicë votash u zgjodh kantautori Pirro Çako. Pas zgjedhjes së kryesisë së re, kërkohet me urgjencë ndërmarrja e hapave të menjëhershme për ndryshimin e situatës. Çako duhet të vijojë punën e lënë në mes nga ish-kryetari Neshat Tozaj, i cili u nda nga jeta pak kohë më parë. Por nuk ka për të qenë edhe fort e lehtë. Nga raporti i lexuar nga kryesia e vjetër, Shqipëria është shumë prapa në zbatimin e të drejtave të autorit. Qindra subjekte private (televizione, radio, hotele, bare, klube...), madje edhe shtetërore kanë shfrytëzuar krijimtarinë e artistëve shqiptarë, por edhe të huaj, në mënyrë pirate, pa iu nënshtruar asnjë lloj detyrimi financiar. Për shkak të moszbatimit të Ligjit "Për të drejtat e autorit", në arkën e Agjencisë "Albautor" kanë hyrë gjatë kësaj periudhe shumë pak të ardhura. Kjo është edhe arsyeja pse në këto vite artistët janë shpërblyer shumë pak për krijimtarinë e tyre. Jo vetëm që ligji nuk është zbatuar, por edhe vetë agjencia, në rrezik shkrirjeje, nuk ka zotëruar autoritetin e duhur, për të kërkuar të drejtat e saj. Këtë e tregon edhe takimi i asamblesë pas 18 vjetësh. Por sot Shqipëria ndodhet në një tjetër situatë. Është nënshkruar Marrëveshja e Stabilizim-Asociimit, e cila në një prej kushteve që duhen përmbushur ka mbrojtjen e së drejtës së autorit. Deri më sot shumë pak është bërë në këtë drejtim, çka do të thotë se ka shumë punë për t'u bërë përpara.