Plagosën 33-vjeçarin, në kërkim babë e bir

Librazhd- Babë e bir sulmojnë me mjete të mprehta dhe të forta një shtetas, duke i shkaktuar atij dëmtime në trup dhe pas kësaj janë larguar në drejtim të paditur.

Mësohet se sherri është regjistruar në afërsi të vendit të quajtur Kryqëzimi i Ushtarakut, në qytetin e Librazhdit. “Shtetasit Mevlan Alikaj, 51-vjeç dhe Elio Alikaj, 21-vjeç kanë goditur me thikë dhe sende të tjera metalike një 33-vjeçar me banim në Librazhd”- thanë burimet e policisë lokale.

Ngjarja e regjistruar në mbrëmje ka bërë që forca të shumta policie të rrethojnë vendin e ngjarjes, duke u vënë në kërkim të autorëve të cilët janë larguar në drejtim të paditur.

Dy shtetasit e mësipërm janë shpallur në kërkim për veprën penale të vrasjes me dashje të mbetur në tentativë. Sherri mes tyre mësohet të ketë ndodhur pas një konflikti të mëparshëm.