Policia: Gruaja mashtronte të moshuarit

Hetuesit grekë kanë hedhur dritë mbi disa çështje të pazbardhura ku dyshohet se 54-vjeçarja Zhanga mashtronte kryesisht të moshuar, por nuk kanë munguar edhe krime të tjera të kryera prej saj, në zona të ndryshme të Greqisë. Zhanga u akuzua nga sigurimi i Patrës për vdekjen e sipërmarrësit, 42-vjeçarit Tasos Tsagaropoulos. Hetuesit për dy ditë me radhë nuk kishin mundur të nxirrnin asgjë nga minoritarja, e cila kishte preferuar ta mbante gojën mbyllur. Sipas dëshmisë së saj, ajo bashkë me të dashurin i kishin dhënë qetësues një të moshuari, i cili nuk jetonte më dhe më pas ka treguar vrasjen e 42-vjeçarit, që e interpretoi si një ekzekutim pas mosmarrëveshjeve ekonomike. Ajo ka dëshmuar se e kishte qëlluar sipërmarrësin me një çekiç pas koke dhe më pas me thikë në fyt. Gruaja dëshmoi se ajo detyrohej prej viktimës të mashtronte të moshuarit, që i bënte shokë, duke u marrë shuma të konsiderueshme parash. Kanë qenë mosmarrëveshjet për ndarjen e parave ajo që ka sjellë edhe fundin e marrëdhënies së tyre. Prokuroria ka ngritur mbi minoritaren 13 akuza ku përfshihen; grabitja, vjedhja me anë të mashtrimit, vrasje dhe shkaktim vrasjeje, të disa personave. Pastaj, disa mandat-arreste janë lëshuar nga Prokuroria e Patrës duke u dhënë mundësi hetuesve të vazhdojnë me orë të tëra marrjen e dëshmive, të cilat kanë dhënë informacion të vlefshme për ngjarjen, duke hedhur dritë për lidhjet e personave të dyshuar të përfshirë në aktivitetin e mashtrimit të të moshuarve me qëllim përfitimin nga pasuria e tyre.