Pranë dorëheqjes
Edhe pse doli “gjallë” nga mocioni i fundit i mosbesimit, presidenti i Barcelonës, Joan Laporta, duket se është ende në rrezik për të lënë presidencën e skuadrës katalanase. Gjendja në stafin drejtues të skuadrës është rënduar shumë, saqë nesër ai me shumë mundësi do të japë dorëheqjen. Kështu mund të mbyllet një kapitull jo shumë i lumtur për skuadrën spanjolle, por mbase mund të hapet një epokë e re.
E përditshmja katalanase “Sport”, ka qenë ajo që e ka bërë të ditur këtë lajm. “I vënë nën presion edhe pas mocionit të mosbesimit, - shkruan gazeta spanjolle, - numri një i klubit katalanas është detyruar që të mbledhë një komision të jashtëzakonshëm të stafit drejtues nesër, ditë në të cilën mendohet se do të japë edhe dorëheqjen”. Qëllimi i “kolonelëve” të Barcelonës është që Laporta të largohet dhe drejtimin e skuadrës ta marrë zëvendëspresidenti Albert Vicens, i cili në krah do të ketë edhe Ferran Sorianon. Kështu që nuk do të ketë zgjedhje në dy vitet e ardhshme dhe projekti “Guardiola” nuk do të mund të vdesë ende pa lindur. Në merkaton e Barçës kjo dorëheqje do të ndryshonte shumë pak, dhe Ronaldinjo e Eto nuk do të mund të kthehen më në skuadër.
Misioni i mosbesimit ndaj Laportës u shua nga votimet që u kryen të dielën, dhe ky mocion u nis nga armiqtë numër një të presidentit katalanas, Giralt dhe Castellvi. Mbi 50 për qind e 118.528 aksionerë (edhe pse jo të gjithë kanë shkuar në kutitë e votimit), kanë qenë për largimin e Laportës, por kjo ka qenë e panevojshme, pasi për ta larguar atë duheshin mbi 66 për qind të votave. Laporta ka qenë i akuzuar për shpenzimin e kotë të parave, të cilat nuk kanë shërbyer në ngritjen e klubit në nivelet më të larta. Sipas asaj që thekson “El Mundo Deportivo”, skuadra katalanase ka mohuar gjithçka, por në Barcelonë të gjithë janë të sigurt, se Laporta i ka orët e numëruara dhe nesër do të japë dorëheqjen.