Pranga dy shqiptarëve, autorë të 55 grabitjeve

Policia italiane ka arrestuar dje dy shqiptarë si eksponentë kryesorë të një grupi grabitësish me rekord 55 vjedhje të dokumentuara. Një djalë i moshës 31- vjeçare, i cili banonte në Prato, u arrestua së bashku me një shokun e tij, që të dy shqiptarë në mërgim në Itali, nga policia e Bolzanos, me akuzën se është autor i 55 grabitjeve në apartamentet e një zone të vetme. Zona e Alto Adiges ishte epiqendra e sulmeve të tij, ndërsa veprimtari më të rrallë ushtronte edhe në zona të tjera, si në Milano dhe Lodi. Nga ky operacion u bë i mundur sekuestrimi i pesë makinave të vjedhura, 10 mijë eurove, florinj të vjedhur që kapin vlerën e 20 mijë eurove, kompjuter dhe pajisje të tjera kompjuterike me vlerë 15 mijë euro. Ndërkaq, nga ana e policisë thuhet se ky operacion po vijon ende dhe se janë denoncuar edhe shqiptarë të tjerë si të përfshirë në grupin e grabitësve. Policia e Bolzanos ka nisur një operacion të gjerë në kapjen dhe neutralizimin e të gjitha grupeve që kryejnë grabitje, ndërsa në këtë zonë vetëm muajt e fundit janë goditur tre grupe shqiptarësh.