Presidenti Nishani nis konsultimet për kryeprokurorin e ri – PS rreshtohet kundër, por PBDNJ nuk e ndjek

Presidenti, Bujar Nishani thirri sot ne takime te veçanta konsultuese me përfaqësuesit e partive politike parlamentare, te cilat synojnë te evidentojnë vlerat me te mira qe duhet te përfaqësoje figura e ardhshme e Prokurorit te Përgjithshëm, si një pozicion i rëndësishëm ne sistemin e drejtësisë ne Shqipëri. Në orën 10:00 ashtu siç e parashikon axhenda është shfaqur në ambientet e Presidencës kryetari i grupit parlamentar të PD-së, Astrit Patozi, i cili ka startuar dhe turin e konsultimeve për kryeprokurorin e ri të Republikës. Mësohet se gjatë kësaj bisede kreu i ligjvënësve demokrate ka propozuar qe kandidati të jetë i fushës së drejtësisë, të ketë integritet moral dhe profesional. Kreu i ligjvënësve socialistë, Gramoz Ruçi ka përfunduar takimin me Presidentin Nishani ka shprehur qartazi qëndrimin e forcës parlamentare që përfaqëson lidhur me mandatin e Prokurores së Përgjithshme Ina Rama. Sipas tij, PS është e mendimit se mandati i kryeprokurorit aktual përfundon në 23 maj dhe jo në 22 nëntor, siç mendon mazhoranca qeverisëse dhe vetë kreu i shtetit. Një qëndrim të tillë, Ruçi e bëri me dije se e ka propozuar dhe me shkrim për Presidentin, ndërkohë që mesazhin se Ina Rama është shumë e rëndësishme për PS-në e ka perseritur edhe Edi Rama dora vetë, ne nje deklarate te posaçme per shtyp. Megjithatë, duket se ne koalicionin “kashtë e koqe” të opozitës s’ka konsensus per asgje. Kreu i PBDNJ-së Vangjel Dule, ne takimin me presidentin, ka deklaruar se data e mbarimit te mandatit te kryeprokurorit për të eshte nje detaj i parendesishem. Lëvizja Socialiste për Integrim nuk ka propozuar një emër konkret për kandidaturën e Kryeprokurorit të ri. Një fakt i tillë behët i ditur paraprakisht nga kjo seli, ndërkohë që konfirmohet se kreu i grupit parlamentar i kësaj partie, Lefter Koka i ka propozuar kreut të shtetit gjatë takimit për përcaktimin e kritereve që duhet të gëzojë kandidatura për postin e Prokurorit të Përgjithshëm, që kjo figurë të ketë integritet moral, profesional, të mos ketë implikime në të shkuarën dhe të ketë  eksperiencë në drejtësi.