Presidenti maqedonas Ivanov i premton kryeministrit Berisha tërheqjen nga qarkullimi të enciklopedisë me terma fyese për shqiptarët

Kreu i qeverisë shqiptare i ka kërkuar dje në Nju Jork shpjegime presidentit maqedonas lidhur me publikimin në Maqedoni të një enciklopedie me terminologji antishqiptare, e cila falsifikon historinë, ndërkohë që presidenti maqedon ka premtuar riparimin e menjëhershëm të një veprimi akademik që ishte një provokim i pastër politik

TIRANE – Kryeministri theksoi se publikimi se fundmi, nga ana e Akademisë Maqedonase, i një enciklopedie është një qëndrim absurd dhe i papranueshëm. Duke qenë se Akademia është një institucion zyrtar i Republikës së Maqedonisë, ndërhyrja e autoriteteve të lartë maqedonase me një qëndrim të qartë ndaj këtij problemi do të ishte e domosdoshme, për faktin se askush nuk mund të ndërtojë identitet bazuar mbi falsifikim të historisë.
Gjatë punimeve të Asamblesë së Përgjithshme të Organizatës së Kombeve të Bashkuara, Kryeministri Berisha ka zhvilluar një takim me Presidentin e Maqedonisë, z. Gjorge Ivanov. Gjatë bisedës, të dy personalitetet rikonfirmuan marrëdhëniet shumë të mira e miqësore ndërmjet të dy vendeve, si dhe vendosmërinë e palëve për t’i forcuar e zgjeruar ato dhe bashkëpunimin në të gjitha fushat edhe më tej, në të ardhmen.
Kryeministri e njohu Presidentin me vendosmërinë e qeverisë shqiptare për të kompletuar lidhjen hekurudhore me Maqedoninë dhe i bëri me dije se rruga e Arbrit, që po ndërtohet nga qeveria shqiptare, shkurton distancën me Shkupin rreth 100 km.
Integrimi evropian është një tjetër fushë ku mund të rritet bashkëpunimi dhe Maqedonia është e gatshme t’i ofrojë Shqipërisë përvojën, në veçanti për sa i përket përgatitjeve për statusin e vendit kandidat për anëtar në BE. Duke e përgëzuar Kryeministrin Berisha për anëtarësimin e Shqipërisë në NATO, Presidenti Ivanov u shpreh se vend i tij ndihet shumë krenar për këtë arritje të popullit fqinj e mik shqiptar.
Kryeministri Berisha theksoi se publikimi së fundmi nga ana e Akademisë Maqedonase i një Enciklopedie, e cila falsifikon historinë, është një qëndrim absurd dhe i pa pranueshëm. Duke qenë se Akademia është një institucion i Republikës së Maqedonisë, ndërhyrja e autoriteteve të lartë maqedonas me një qëndrim të qartë ndaj këtij problem, do të ishte e domosdoshme, për faktin se askush nuk mund të ndërtojë identitet bazuar mbi falsifikim të historisë.
Lidhur me këtë çështje, Presidenti Ivanov tha se, sapo të kthehej në Shkup, do përpiqet të ndikojë në këtë çështje.