Prishen ndërtimet pa leje, policia blindon Velipojën

Mjete të blinduara të Forcave të Ndërhyrjes së Shpejtë në Shkodër dhe rreth 50 punonjës policie kanë mbajtur të rrethuar gjithë plazhin e Velipojës dje. Policët kanë qenë në Velipojë për të mbështetur dhe ruajtur fizikisht punonjësit e komunës dhe inspektoratit të ndërtimit, që prej disa ditësh kanë nisur betejën me ndërtimet pa leje. Prishja e shumë ndërtimeve pa leje, të cilat vazhdojnë ende në plazhin e Velipojës, ka bërë që situata atje mes pronarëve të ndërtesave dhe ndërtimorëve të acarohet së tepërmi. Tensioni mes palëve ka nisur të hënën, kur inspektorati i ndërtimit shembi katër pallate në ndërtim të firmës "Fisha". Të hënën, njëri nga pronarët e firmës, së bashku me menaxherin, janë shoqëruar në komisariatin e policisë për të evituar përplasjet mes palëve. Vetëm para pak ditësh kryetari i Komunës Velipojë, Nikollë Marku, paralajmëroi se të gjitha ndërtimet pa leje që ndodhen më pak se 300 larg vijës bregdetare do të prishen. Por mësohet se pronarët e firmës "Fishat", të cilët kishin nisur një investim tepër të madh në plazhin e Velipojës, do të hedhin në gjyq komunën dhe inspektoratin ndërtimor për dëmshpërblim. Sipas drejtuesve të kësaj firme, ndërtimi ishte krejtësisht i rregullt, me leje të dhënë në muajin nëntor të vitit 2007 nga KRTRRSH. Nga ana e saj, Komuna Velipojë pretendon se firma në fjalë ka pasur parregullsi në leje. Muajin e fundit, në plazhin e Velipojës janë prishur rreth 200 ndërtime pa leje, ndërsa në plan janë për t‘u prishur edhe 80 ndërtime të tjera.