Prishtina kërkon hakmarrjen në Prizren
Liria dhe Prishtina do të përballen sot në mes vete, për herë të dytë në harkun e dy javëve. Prizrenasit fitonin me rezultat minimal, 1:0, herën e fundit. Mirëpo, ata i pret një punë e vështirë sot, pasi që bardhekaltrit kanë bërë progres, edhe pse barazuan në duelin e fundit me Drenicën.
Në anën tjetër, ekipi bardhezi vjen pas dy humbjeve radhazi në udhëtim, të fundit nga Vëllaznimi. Trajneri i prizrenasve, Skënder Shëngyli, është i vetëdijshëm se ekipi i tij do ta ketë vështirë ta mposhtë të njëjtin ekip dy herë, brenda një periudhe të shkurtër, por ekipi i tij do ta mundohet ta përsërisë ndeshjen e fundit ndaj prishtinasve.
“Të dy ekipet kanë qëllime të njëjta. Ne vijmë pas dy humbjeve radhazi, e Prishtina pas barazimit me Drenicën. Prandaj, të dyja ekipet synojnë t’u rikthehen fitoreve. Pres një ndeshje të bukur, por është e vështirë ta fitosh një ekip brenda një kohe të shkurtër dy herë. Kjo e bën edhe më të vështirë punën tonë”, deklaroi Shëngyli për Express.
“Neve na nevojitet motiv shtesë. Nga lojtarët pres që ta përsërisin ndeshjen e parë, ngase pa angazhim dhe pa mobilizim, nuk mund të arrish fitoren. Kemi lojtarë që janë të përqendruar, kërkoj nga ta të jenë agresivë, në suazat e korrektësisë. Në këtë sfidë, të gjitha rezultatet janë të mundshme”, vazhdoi Shëngyli.
Në anën tjetër, bardhekaltrit që drejtohen nga gjermani Wolfgang Jerat, janë të bindur se ekipi i tyre do të dalë mirë nga stadiumi ‘Përparim Thaçi’.
“Do të shkojmë për fitore, pasi që duam ta rikthejmë kreun e tabelës. Gjithashtu, duam të nxjerrim hak ndaj Lirisë, për humbjen e shkaktuar javë më parë. Jemi të përgatitur maksimalisht, por nuk do të jetë ndeshje aspak e lehtë për ne. Ne luftojmë për titull, kurse Liria për mbijetesë, prandaj na pret një punë e vështirë”, deklaroi mesfushori Driton Krasniqi. Kjo ndeshje fillon në ora 13:15.
E diel
Liria – Prishtina 13:15
Besa – Drenica 15:00
Lepenci – Trepça’89 15:00
Gjilani – Hysi 15:00