Profesorët e QSUT-së: Popull, shëndetësia është në krizë!

Sistemi shëndetësor është në krizë dhe ne nuk do të heshtim më ndaj kaosit që është krijuar në këtë sistem. Alarmin për kalbëzimin e sistemit shëndetësor e kanë dhënë vetë profesorët e Fakultetit të Mjekësisë dhe njëkohësisht shefa shërbimi në Qendrën Spitalore Universitare “Nënë Tereza”, të cilët janë mbledhur dje dhe kanë pranuar problemet madhore të shëndetësisë shqiptare duke ia bërë të ditur popullit. Madje ata kanë premtuar se do të vazhdojnë protestat derisa të realizohen reforma të thella për përmirësimin e sistemit shëndetësor. Profesor Jovan Basha, shef i shërbimit të Gastroenterologjisë, në QSUT, shpjegoi për gazetën të gjitha detajet dhe kërkesat e shtruara në mbledhjen e profesorëve të shëndetësisë. Ndërkohë ai thekson se për të realizuar reformat, duhet që të merret patjetër mendimi i profesorëve të Fakultetit të Mjekësisë.

Alarmi për sistemin

Tashmë para shëndetësisë shqiptare është shtruar çështja e ekzistencës së saj. Kështu u shprehën shefat e QSUT-së gjatë mbledhjes së djeshme, duke renditur disa nga pikat më problematike të sistemin shëndetësor. Sipas profesor Jovan Bashës, shëndetësia shqiptare ka probleme madhore të cilat lidhen me financimin e pamjaftueshëm, organizimin problematik dhe reformat vetëm propagandistike dha pa asnjë rezultat. Gjithashtu ai thekson se problematika e shëndetësisë pasqyrohet edhe në cilësinë e mangët të shërbimit, gjendjen e mjerueshme të spitaleve dhe mungesat e shumta në aparatura. Ndërkohë ajo që pranojnë profesorët e QSUT-së pa asnjë hezitim për sistemin shëndetësor është edhe korrupsioni, si në çdo fushë të jetës në vendin tonë.

Reforma

Mjekësia shqiptare ka nevojë për reformë të thellë, reformë e cila të përfshijë të tërë sistemin shëndetësor, organizimin, financimin, mënyrën e drejtimit e deri në strukturat më të ulëta të mjekësisë shqiptare. Ky ka qenë thelbi i gjithë diskutimeve mes Profesoratit të Shëndetësisë për sistemin. Sipas Jovan Bashës, profesorët në mbledhje kanë theksuar që këto reforma të funksionojnë normalisht, i takon profesorëve të Fakultetit të Mjekësisë që të japin mendime për mënyrën si duhet të zhvillohet kjo reformë. “Është për të ardhur keq, kur ne konstatojmë që mendimi i këtij Profesorati anashkalohet ose nuk merret fare parasysh nga politika, siç mjerisht ka ndodhur me një sërë rregulloresh e me Statutin e QSUT, ku nuk përmenden fare të drejtat dhe detyrat p.sh., të një shefi shërbimi”,- pohon Jovan Basha duke shtuar se QSUT përbën mënyrën më të keqe të administrimit të një institucioni shëndetësor. Gjithashtu ai pohon se në mbledhjen e profesorëve u theksua se të gjitha qeveritë shqiptare, nga 1990 e deri me sot, janë marrë pak ose aspak me problemet e shëndetësisë, duke i hapur rrugën një zhvillimi spontan e anarkik, i cili ka bërë të pakënaqur popullin për ndihmën mjekësore të marrë por edhe mjekët për cilësinë e shërbimit mjekësor që japin. Sipas tij dhe për faktin se shpesh, jo për faj të tyre, mjekët gjenden nën shënjestrën e opinionit publik, i cili gabimisht mendon se shkaktarë të kësaj gjendjeje janë ata.

Ministria: Jemi të vendosur për reforma

Revolta e profesorëve të Fakultetit të Mjekësisë ka nxitur Ministrinë e Shëndetësisë të deklarojë që janë të vendosur të realizojnë reformimin e sistemit shëndetësor. Por nga ana tjetër dikasteri i Shëndetësisë, fajtor për këtë sistem ka bërë edhe disa ish-ministra të Shëndetësisë dhe drejtues të larët të këtij sistemi. “Bashkohet me vlerësimin e profesorëve, disa prej të cilëve ish-ministra dhe ish-drejtues të lartë të enteve shtetërore e universitare vendimmarrës, se gjatë 17 viteve të fundit, ka pasur probleme dhe mungesë të reformave thelbësore në sistemin shëndetësor dhe që ende shëndetësia funksionin mbi Ligjin bazë të vitit 1963”,- pohojnë burime zyrtare të Ministrisë së Shëndetësisë duke shtuar se mbështesin Profesoratin në kërkesën e tyre për rritjen e kontributit financiar shtetëror e qytetar në financimet e shërbimit shëndetësor, në mbrojtjen e jetës dhe integritetit profesional të çdo punonjësi të sektorit shëndetësor. Gjithashtu burimet zyrtare pohojnë se i mbështesin profesorët edhe në kërkesën e tyre për ruajtjen e pjesës profesionale të shëndetësisë nga rotacionet politike, si dhe në nevojën për veprime konkrete në dobi të reformës.