Prokuroria: Policia e ngathtë në veprime

02/02/2005  Gjatë analizës së viti 2004

DURRES - Organi i akuzës në Durrës ka fajësuar policinë për

ngathësi dhe mungesë profesionalizmi në ekzekutimin e

urdhërarresteve të lëshuar nga prokuroria për personat

nën akuzën e kryerjes së veprave penale. Pohimet janë

bërë nga krerë të lartë të prokurorisë gjatë

zhvillimit të analizës vjetore të punës së organit të

akuzës në Durrës. Në këtë analizë kanë qenë të

pranishëm krerët e Gjykatës së Faktit si dhe ata të

Drejtorisë së Policisë së Durrësit, ndërkohë që burime

nga prokuroria deklarojnë se analiza është zhvilluar

nën një tension të lartë debatesh. Ato janë

përqendruar kryesisht në vullnetin e ndërsjellë për

të përmbushur detyrimin ligjor dhe një kërkesë e

tillë i është drejtuar me këmbëngulje organeve të

policisë. Megjithëse në tërësi është cilësuar

bashkëpunimi në rrugë institucionale mes prokurorisë,

policisë dhe gjykatës, krerët e prokurorisë kanë

theksuar se niveli profesional i policisë ka lënë

shumë për të dëshiruar. Gjatë vitit të kaluar është

thënë se janë hetuar 1800 çështje penale, shifër kjo

më e larta krahasuar me të gjitha vitet pararendëse të

marra veçmas. Ndërsa të gjithë treguesit janë cilësuar

të suksesshëm, në analizë është thënë se rezultate të

dukshme janë shënuar në hetimet ndaj veprave penale si

krimi i organizuar, evazioni fiskal, bandat kriminale

dhe trafiku i të gjitha llojeve. Sipas deklarimeve të

bëra pas analizës thuhet se një rëndësi e veçantë i

është kushtuar plotësimit të dosjeve për krimet që

gjykohen në Gjykatën e Krimeve të Rënda, ndërkohë që

është cilësuar se janë goditur edhe grupe kriminale në

Durrës dhe Shijak kryesisht të akuzuar për trafiqe dhe

organizata kriminale