Prokuroria liron të arrestuarin nga policia për prostitucion në Berat
• BERAT – Prokuroria e Beratit urdhëroi lirimin e një personi të arrestuar nga policia e këtij qyteti, pasi gjykata italiane në Verona e kishte dënuar atë me shtatë vjet burg për shfrytëzim prostitucioni.Burime zyrtare të policisë së Beratit, konfirmuan dje se rreth orës 19:00 të datës 22 shkurt 2008, shërbimet e rendit kanë bërë arrestimin e 46-vjeçarit, Myrteza Toto. Sipas policisë, i arrestuari është banor i qytetit të Beratit ndërsa ndalimi i tij është bërë pasi ai figuronte person në kërkim. Bazuar në të dhënat e policisë, mësohet se i ndaluari ishte shpallur në kërkim me vendim penal të Gjykatës së Veronës në Itali në datën 10 janar 1997, i cili ka marrë formë të prerë më 20 tetor 1997. Sipas policisë, Gjykata e Veronës e kishte dënuar me 7 vjet heqje lirie Myrteza Toton për konsumimin e veprës penale atë të “shfrytëzimit të prostitucionit në rrethana rënduese”, vepër penale e parashikuar nga neni 114/2 të Kodit Penal shqiptar. Pak orë pas ndalimit të 46-vjeçarit Myrteza Toto nga policia dhe shoqërimit të tij në dhomat e paraburgimit të komisariatit të Beratit, dosja penale i ka kaluar Prokurorisë. Organi i akuzës menjëherë sapo ka marrë në shqyrtim dosjen penale ka shqyrtuar arrestin e policisë. Pas kësaj prokurori ka nxjerrë urdhrin “për shfuqizimin e urdhrit të ekzekutimit të Prokurorisë të Beratit”. Me këtë urdhër Prokuroria ka bërë shfuqizimin e masës së sigurisë ndaj shtetasit Myrteza Toto, i cili në zbatim të vendimit të Prokurorisë është lënë i lirë. Ky nuk është rasti i parë i “përplasjeve” mes policisë dhe Prokurorisë për arrestimet e personave të kërkuar me dënime të gjykatave italiane. Edhe më parë policia ka bërë ndalimin e personave, që në listën e Interpolit figuronin të dënuar në Itali për më pas arrestimet e tyre janë cilësuar të paligjshme nga Prokuroria. Mirëpo kohët e fundit Shqipëria dhe Italia kanë nënshkruar një marrëveshje të përbashkët për njohjen dhe zbatimin e vendimeve penale të gjykatave respektive. Nënshkrimi i marrëveshjes erdhi pas negociatave dypalëshe dhe këmbënguljes së palës italiane, e cila ka pretenduar se rreth 200 shqiptarë të dënuar dhe të kërkuar në Itali janë kthyer në vendlindje dhe nuk arrestoheshin nga autoritetet shqiptare. d.xh