Prokuroria pranon se s’ka asnjë provë për të ngritur një akuzë

Skandali i prokurorisë në gjyqin e Ilir Metës

Vartësit e Ina Ramës kërkojnë heqjen dorë nga ekspertimi i orës së video-përgjimit. Në procesin e mëparshëm gjyqësor prokuroria kërkoi të mos i nënshtrohej ekspertizës dhe as të merrej si provë regjistrimi i Dritan Priftit me Leonard Beqirin, teksa ata ndanin një shumë të hollash prej 80 mijë eurosh

Prokuroria shënon një nga skandalet më të mëdha, në të përfolurin gjyqi Meta - Priftin kur pasi dështoi në kërkesën për të hequr nga akti i ekspertimit tre ekspertët shqiptarë, hodhi një hap tjetër, jo thjeshtë amator, por tendencioz dhe të paprecedent, kur refuzoi ekspertimin e orës me të cilën Dritan Prifti vuri në përgjim ish-zëvendëskryeministrin Ilir Meta.
Ishte kjo orë e cila me kërkesë të prokurorisë shqiptare u dërgua për ekspertizë ndërkombëtare, dhe në bazë të së cilës, prokuroria shqiptare kërkoi heqjen e imunitetit të Ilir Metës.
Në këtë seancë, Prokurori i çështjes Bujar Sheshi pretendoi se 3 ekspertët Bujar Pollo, Artur Rrahmani e Ermal Beqiri nuk kanë njohuritë e nevojshme për të kryer ekspertimin, ndërkohë që përzgjedhja e tyre i ka marrë shumë kohë gjykatës, duke përzgjedhur tre ekspertët më të mirë në fushën kibernetike, madje një prej tyre ka tashmë laboratorin e tij privat në fushën e ekspertizës.
Pas dy orësh, trupi gjykues u tërhoq për të marrë vendimin.
Trupi gjykues i Gjykatës së Lartë ka vendosur ekspertimin e orës dhe videos dhe ekspertiza është caktuar data 24 tetor, duke lënë 1 muaj kohë.
Avokati i Ilir Metës, Gëzim Veleshnja menjëherë pas vendimit tha se, “i gjithë ky proces tregon se është e gjitha një lojë politike, ky proces është i montuar dhe mungesa e provës origjinale e bën këtë proces të parregullt ligjërisht. Ne presim vendimin e ekspertëve”, tha avokati Veleshnja.
Në seancën e djeshme gjyqësore, nga ana e përfaqësuesit të prokurorisë iu kërkua gjykatës që ekspertët e thirrur prej saj të mos u vënë në dispozicion orën në të cilën është realizuar përgjimi Meta-Prifti, ora është e vetmja provë materiale origjinale, pasi në orë nuk gjendet regjistrimi i fshehtë Meta-Prifti, gjë që tregon se gjithë ky proces është një proces i montuar dhe një lojë politike. Seanca konfirmoi njëkohësisht edhe faktin se prokuroria në mënyrë abuzive ka ndikuar në marrjen e vendimit nga ana e Kuvendit të Shqipërisë për heqjen e imunitetit të deputetit të Ilir Metws.
Ky organ ka dezinformuar publikun dhe deputetët e Kuvendit të Shqipërisë kur kanë deklaruar në kërkesën e tyre se disponon filmimin origjinal dhe provën origjinale materiale të marra në “orën përgjuese”.
Mungesa e provës origjinale materiale, në vështrim të dispozitave të Kodit të Procedurës Penale por edhe të praktikave gjyqësore të vendit tonë dhe të vendeve të tjera ndërkombëtare e bën këtë proces të parregullt ligjërisht. Çdo filmim i cili gjendet në objekte të tjera jashtë provës origjinale materiale nuk mund të përdoret me një fuqi treguese në një proces të rregullt gjyqësor.