Protestat përhapen në gjithë Sirinë

Protestat kundër sundimit 40-vjeçar të familjes Assad janë përhapur në gjithë Sirinë, përfshirë edhe kryeqytetin Damask.

Forcat e sigurisë raportohet të kenë hapur zjarr ndaj demonstruesve, duke qëlluar për vdekje disa prej tyre.

Informacionet lidhur me viktimat nuk kanë mundur të konfirmohen në mënyrë të pavarur, ngase lëvizjet e gazetarëve thuhet të jenë kufizuar nga ana e autoriteteve.

Grupi për të drejtat e njeriut, Amnesty International, ka bërë të ditur për vdekjen e 55 personave gjatë javës së kaluar në qytetin Dara.

Ky qytet është bërë epiqendra protestave kundër presidentit, Bashar al-Assad, i cili e mori pushtetin nga i ati, 10 vjet më parë.

Presidenti i Francës, Nicolas Sarkozy, dënoi dhunën kundër protestuesve në Siri. “Ne do të jemi gjithnjë në krahun e popullit që manifeston pa dhunë e që nuk mund të shtypen me dhunë. Në çdo demokraci mund të ketë manifestime, ndonjëherë të dhunshme, për fat të keq. Por në asnjë demokraci ne nuk mund të tolerojmë mobilizimin e ushtrisë që të qëllojë me plumba të vërtetë kundër protestuesve. Ky është qëndrimi francez dhe ky nuk ndryshon ndaj cilitdo vend që do të bëhej fjalë”, deklaroi Sarkozy.