Protestojnë kundër ushtrisë

Disa mijëra demonstrues u mblodhën të premten në sheshin Tahiri, në Kairo, duke kërkuar dorëzimin e pushtetit ushtarak në Egjipt tek një qeveri civile.

Për shkak të afrimit të zgjedhjeve të para pas rrëzimit të presidenti Hosni Mubarak, demonstruesit kërkojnë kontroll më të madh të Kushtetutës që pritet të miratohet nga parlamenti i ri.

Demonstratat e të premtes u thirrën pas rrjedhjes së një dokumenti qeveritar, në të cilin ushtarët cilësohen si mbrojtës të “legjitimitetit kushtetues”, gjë që aludon në atë se ushtria do të ketë fjalën e fundit në të gjitha çështjet politike.

Vëllazëria Myslimane konsideron se ky dokument e kthen prapa diktaturën, kështu që premton eskalimin e trazirave nëse nuk bëhet ndryshimi i këtij formulimi.

Liberalët, majtistët, partitë islamike dhe lëvizjet prodemokratike që iniciuan kryengritjen e 25 janarit, ishin pjesë e protestave. Mirëpo, edhe pse në protesta morën pjesë grupe të ndryshme politike, apeli i dërguar ishte unik, që ushtria t’ia dorëzojë pushtetin një qeverie civile sa më parë që të jetë e mundur.

Disa grupe sekulariste protestuan nën parullën “Duam presidentin”, duke i thirru kështu në vendimin e Këshillit Suprem të Forcave të Armatosura (SCAF), sipas të cilit pushtetit do t’i dorëzohet një presidenti civil deri në prill të vitit 2012.