Qeveria e Kosovës: Në zgjedhjet serbe do marrin pjesë vetëm qytetarët që disponojnë të dy pasaporta

Sipas marrëveshjeve të qeverisë së Kosovës dhe Serbisë, me ndërhyrjen e OSBE-së serbët e veriut do votojnë vetëm për zgjedhjet parlamentare dhe presidenciale dhe jo për ato lokale

“Qeveritë e Kosovës dhe Serbisë duhet të përgëzohen për gatishmërinë e tyre për t’u siguruar votuesve me të drejtë vote mundësinë për të ushtruar të drejtat e tyre demokratike”, thuhet në një deklaratë të përbashkët të vendeve të Kuintit, ku bëjnë pjesë Franca, Gjermania, Italia, Britania e MAdhe dhe Shtetet e Bashkuara të Amerikës. “Ne i jemi mirënjohës OSBE-së për gatishmërinë e saj për të ndërmarrë këtë detyrë sfiduese me afat të shkurtër dhe i ofrojmë mbështetjen tonë të plotë ekipit të misionit të OSBE-së në Kosovë”, thuhet në deklaratë.
OSBE përmes një deklarate për shtyp ka konfirmuar arritjen e marrëveshjes për rolin lehtësues që do të ketë ky mision në organizimin e zgjedhjeve parlamentare dhe presidenciale të Serbisë në Kosovë. Kryesuesi i OSBE-së, njëherësh zëvendëskryeministër i Irlandës, Imon Gilmor ka mirëpritur këtë marrëveshje, dhe ka sqaruar se vetë ai ka qenë në kontakt me palët e përfshira. Zgjedhjet lokale, presidenciale dhe parlamentare të Serbisë mbahen më 6 maj. Autoritetet kosovare kanë lënë të kuptohet se duke marrë për bazë parimin e dyshtetësisë, serbët e Kosovës mund të votojnë në zgjedhjet presidenciale dhe parlamentare, por jo edhe për ato lokale, të cilat politikanët serbë të Veriut këmbëngulin që t’i mbajnë. Qeveria e Republikës së Kosovës mirëpret vendimin e OSBE-së për lehtësimin e votimit për qytetarët serbë me shtetësi të dyfishtë, në zgjedhjet e 6 majit. Në deklaratën e qeverisë së Kosovës thuhej se ky vendim i OSBE-së është i bazuar në parimet dhe vlerat evropiane. Gjithashtu në harmoni me Dokumentin Gjithëpërfshirës të Presidentit Ahtisaari, Kushtetutën dhe ligjet e Republikës së Kosovës. Gjatë kësaj dite do të hapen qendra mobile votimi, do të ketë vetëm simbole të OSBE-së, ndërsa numërimi do të bëhet jashtë territorit të shtetit të Kosovës, në mungesë aktuale të Ambasadës së Serbisë në Republikën e Kosovës, dhe anasjelltas. Qeveria e Republikës së Kosovës vlerëson se ky është një hap i madh për shtetin e Kosovës, sepse për herë të parë Serbia ka rënë dakord që të mos organizojë asnjë lloj zgjedhje në Kosovës, 13 vjet pas përfundimit të luftës.