Qeveria po ndërhynë në punën e gjyqësorit

Grupi i Ekspertëve për drejtësi i Lidhjes Demokratike të Kosovës vlerëson se për shkak të një sistemi gjyqësor dhe prokurorial joefikas dhe të politizuar gjendja e drejtësisë po pësojnë zhvillime negative e të dëmshme, ku sipas tyre po ndikojnë në pamundësinë e ndërtimit të shtetit të së drejtës.

Arben Gashi, kryesues i grupit të ekspertëve të LDK-së për drejtësi, në një konference për media të shtunën vlerëson se sistemi aktual i drejtësisë në vend është në gjendje të mjerueshme, andaj sipas si duhet që në mënyrë urgjente të merren hapa drejt përmirësimit.

“LDK-ja vlerëson se procesi i ligjbërës gjatë gjysmës së parë të vitit 2011 karakterizohet me propozim-ligje që përveç defekteve strukturore dhe përmbajtjesore përballen edhe me probleme logjike dhe konceptuale. Situatë jashtëzakonisht e rendë në aspektin e nxjerrjes së ligjeve paraqitet situata në ato raste ku propozim-ligjet që kanë shkuar në Kuvendin e Republikës së Kosovës dhe janë aprovuar në Kuvend nuk kanë qenë të buxhetuar”, ka thënë Gashi.

Sipas tij, kanë mbetur pa buxhet Ligji për Mbrojtjen e Dëshmitarëve, Ligji për Bashkëpunimin Juridik Ndërkombëtar në Çështje Penale dhe Ligji për Ndihmë Juridike Falas.

Gashi thotë se LDK-ja ka konstatuar se nuk vërehet përparim në zhvillimin e sistemit gjyqësor të qëndrueshëm në Kosovë. Po ashtu, sipas ekspertëve të këtij subjekti politik, sfidë shumë e madhe mbetet edhe gjendja në sistemin prokurorial.

“Konstatohet se sistemi gjyqësor dhe sistemi prokurorial në Kosovë përballen me sfida të mëdha në aspektin e pavarësisë së tyre financiare, funksionale, por edhe operacionale. Si rezultat i ndërhyrjes së Qeverisë në punën e gjyqësorit dhe të prokurorisë, me qëllim të kontrollit politik, po ashtu edhe në aspektin e mungesave buxhetore të cilat janë pengesë kryesore në zhvillimin e kapaciteteve të brendshme të institucioneve të drejtësisë, kemi sistem gjyqësor dhe prokurorial joefikas dhe të politizuar”, ka thënë Gashi.

Grupi i ekspertëve të LDK-së për drejtësi në këtë drejtim ka dalë me disa rekomandime. Sipas tyre duhet të merren masa të cilat garantojnë që në Kosovë të bëhet hartimi, buxhetimi dhe zbatimin e ligjeve të cilat rrjedhin nga rrethanat sociale dhe ekonomike në vend, të jenë në përputhje me standardet ndërkombëtare, si dhe ta kenë të garantuar buxhetin për zbatim.

Gjithashtu ekspertët e LDK-së për drejtësi rekomandojnë që të garantohet ndarja e pushteteve dhe të ndalohet urgjentisht ndërhyrja e Qeverisë në punët e gjyqësorit dhe të prokurorisë, në mënyrë që të krijohet baza e qëndrueshme e punës profesionale.

Në të njëjtën kohë, sugjerohet që të garantohen mekanizmat ligjorë të kontrollit dhe vlerësimit të brendshëm të performancës së organeve të shtetit të së drejtës prokurorisë dhe gjykatave.