Qytetarë sulmuan bazën e militantëve islamik në Bengazi

Pak ditë më parë ishin militantët islamikë që sulmuan selinë e konsullatës amerikane në Bengazi, qyteti i dytë më i madh në Libi. Por tani janë qytetarët e thjeshtë që janë ngritur në protesta kundër Al Qaedas.

Qindra protestues kanë sulmuar një bazë të xhihadistëve, të cilët mendohet se janë përgjegjëse për vrasjen e ambasadorit amerikan, Chris Stevens.

Kjo është një lëvizje e paprecedent e qytetarëve që ngrihen kundër milicisë terroriste, të njohur edhe me emrin brigada Ansar al- Sharia.

BBC bën me dije se katër persona janë vrarë gjatë këtij incidenti.

Mësohet se qytetarët pro- amerikanë rrethuan bazën islamike, ndërsa terroristët tentuan të shpërndajnë turmën duke qëlluar fillimisht në ajër. Më pas ata u arratisën.

Megjithatë përplasja solli viktima.

“Nuk dua të shoh njerëz të armatosur, të veshur si afganë, që më ndalojnë mua në rrugë e më japin urdhra. Dua të shoh thjesht njerëz me uniformë,” tha Omar Muhamed, një student që mori pjesë në protestë.

Shumë libianë kanë shprehur zemërim pas sulmit mbi konsullatën amerikane.