RISHM te nxirren minatoret nga greva

Policia duhet të ndërhyjë për të nxjerrë me forcë minatorët grevistë në Bulqizë. Kjo është kërkesa zyrtare që ka bërë, gjatë së enjtes, kreu i Repartit të Inspektim Shpëtimit në Miniera, pasi ka parë nga afër gjendjen e galerisë ku janë ngujuar 13 minatorë.

Sajmir Zekaj, Drejtori i Përgjithshëm, RISHM, thotë se duhet të ndërhyjë urgjentisht për të  garantuar sigurinë e jetës së njerzve aty dhe për sigurinë e minierës që është pasuri kombëtare. E për këtë kanë ngritur dhe padi në autoritetet përkatëse.

Kushtet ekstreme në të cilat gjenden grevistët dhe përkeqësimi i vazhdueshëm kanë krijuar një situatë krejt të pasigurtë në nivelin e 14-të.

Zekaj thotë se çdo ditë që kalon,  pasojat janë të paparashikueshme e situata është shumë  e rrezikshme.

Gjatë kësaj javë drejtues të RISHM kanë kërkuar të kontaktojnë dhe negociojnë me grevistët por pavarsisht se janë afruar deri në nivelin e 14-të nuk kanë mundur të flasin me ta. Të gjitha rrugët e komunikimit mes nivelit të 13-të dhe 14-të janë mbyllur qëllimisht.

Florian Papadhimitri