Rama, Berisha e Meta zgjedhin stafet e tyre elektorale në 12 qarqe
PS, PD e LSI zgjedhin stafet elektorale në 12 qarqet e vendit, duke përcaktuar emrat që do të përballen midis tyre në betejën e ardhshme elektorale për zgjedhjet parlamentare të vitit 2009. Në 12 qarqet e vendit krerët e tri partive kryesore, Berisha, Rama e Meta, kanë zgjedhur stafin e tyre dhe do të jenë pikërisht emrat e zgjedhur për të drejtuar fushatën në 12 qarqe të vendit, ata që do të zhvillojnë betejën politike për llogari të partive që përfaqësojnë për të fituar zgjedhjet parlamentare të vitit 2009.
PS, PD e LSI janë drejt përfundimit të përcaktimit të listave të plota me emrat që do të drejtojnë fushatën elektorale të zgjedhjeve parlamentare të vitit 2009. Grupet e punës, të përcaktuara nga krerët e tri partive, japin të qartë edhe idenë e stafeve të ngushta të krerëve të tri partive.
Të tre drejtuesit do të qëndrojnë në kryeqytet për të drejtuar, jo vetëm fushatën e qarkut të Tiranës, por edhe për të koordinuar punët e fushatës në tërësi. Rreth dy javë më parë, Kryesia e PS miratoi kujdestarët e qarqeve për fushatën elektorale të kësaj partie. Të 12 emrat që ka zgjedhur Rama të drejtojnë fushatën elektorale të PS, kanë garantuar edhe vendin e parë në listat e qarqeve, ku ata drejtojnë fushatën. Në të njëjtën situatë 12 emrat që drejtojnë fushatën elektorale të LSI në qarqe, janë të garantuar pikërisht në krye të këtyre listave. Ndërsa emrat që janë përcaktuar nga kryetari i PD, Sali Berisha, për të drejtuar punët e partisë në qarqe, pritet të jenë gjithashtu edhe drejtues të fushatës elektorale, sigurisht edhe në pozicione të sigurta në listën e kandidatëve për deputetë të PD në këto zgjedhje.
Përballja
Interesante është përballja e dy grave të majta në qarkun e Dibrës. Përballë Monika Kryemadhit të LSI në Dibër, do të drejtojë betejën politike për PS, zëdhënësja e Kryesisë së kësaj partie, Mimi Kodheli. Prej disa javësh, Kryemadhi ka nisur fushatën elektorale në Dibër, ndërsa Kodheli do të nisë punën së shpejti. Në qarkun e Dibrës, përballë dy grave të majta pritet të jetë i zgjedhur nga Berisha pikërisht Ilir Bano, i cili është zgjedhur bashkë me Njazi Kosovrastin për të drejtuar zgjedhjet në PD e këtij qarku.
Një tjetër përballje grash do të jetë në Korçë. Nga PD është zgjedhur për të drejtuar punët e partisë dhe më pas të fushatës elektorale Marjeta Zaçe, përballë së cilës do të jetë për të drejtuar fushatën e LSI Filloreta Kodra. Ndërsa për PS do të jetë në krye të fushatës Ben Blushi.
Në Shkodër, tri gra të tjera kundërshtarë do të luftojnë politikisht në verën e vitit të ardhshëm përballë njëra-tjetrës. Ato janë Jozefina Topalli e PD, Mimoza Hafizi e PS dhe Esmeralda Uruçi e LSI.
Në Skrapar, ku Ilir Meta pretendon se ka garanci në fitoren e LSI, do të jetë në krye të listës Nasip Naçi, të cilin vetë Meta e prezantoi para elektoratit të LSI, ku dhe shpjegoi arsyet e zhvendosjes së tij nga Skrapari drejt Tiranës. Për PS do të drejtojë betejën elektorale Erion Braçe bashkë me Marko Bellon. Ndërsa nga PD betejës së Beratit do t’i shtohet një grua e zgjedhur prej Berishës për të drejtuar zgjedhjet e PD në Berat. Ajo është ministrja e Integrimit, Majlinda Bregu. Bashkë me Bregun në Berat do të jetë në krye të fushatës edhe Edmond Spaho.
Më e vështirë duket situata për disa kujdestarë të PS në disa qarqe, siç është ai i Durrësit, ku i zgjedhur si kujdestar është Namik Dokle. Përballë tij do të jenë në krye të fushatës për PD Gazmend Oketa dhe Gjergj Lezhja, të dy zyrtarë të lartë të mazhorancës, ndërsa Dokle, duket se rrezikon me transferimin e tij nga Elbasani, ku dhe ka mbështetjen në elektorat, pasi atje është zgjedhur si deputet për disa legjislatura.
Të vështirë duket se do ta ketë misionin e tij në krye të shtabit elektoral edhe Pandeli Majko në Kukës. Majko vjen nga Korça dhe shkon në Kukës. Për këtë transferim Majko pati shfaqur rezervat e tij në mbledhjen e Kryesisë së PS, ku dhe u miratua lista e kujdestarëve të Kryesisë në shtabet elektorale të qarqeve. Të njëjtin problem paraqiti edhe Dokle, duke theksuar se nuk kishte pasur kontakte intensive me elektoratin socialist të Durrësit, dhe për të do të jetë e vështirë puna gjatë fushatës elektorale.
PS
Qarku Berat
Erion Braçe
Qarku Durrës
Namik Dokle
Qarku Dibër
Mimi Kodheli
Qarku Elbasan
Valentina Leskaj
Qarku Fier
Ermelinda Meksi
Qarku Gjirokastër
Gramoz Ruçi
Qarku Korçë
Ben Blushi
Qarku Kukës
Pandeli Majko
Qarku Lezhë
Lindita Nikolla
Qarku Tiranë
Shpëtim Idrizi
Qarku Shkodër
Mimoza Hafizi
Qarku Vlorë
Arben Isaraj
PD
Tiranë
Sali Berisha dhe deputetët e Tiranës
Shkodër
Jozefina Topalli, Astrit Bushati
Kukës
Jemin Gjana, Aleksandër Biberaj
Dibër
Ilir Bano, Njazi Kosovrasti
Lezhë
Edi Paloka, Fatos Beja
Durrës
Gazmend Oketa, Gjergj Lezhja
Elbasan
Lulëzim Basha, Halit Shamata
Berat
Majlinda Bregu, Edmond Spaho
Fier
Sokol Olldashi, Genc Ruli
Korçë
Ridvan Bode, Marjeta Zaçe
Kavajë
Flamur Noka
Rrethi i Tiranës
Gent Strazimiri
Gjirokastër
Genc Pollo, Ilir Rusmali
Vlorë
Astrit Patozi, Leonard Demi
LSI
Tiranë
Ilir Meta, Petrit Vasili
Berat
Nasip Naço
Durrës
Iliaz Labi
Vlorë
Brizida Gjikondi
Fier
Dritan Prifti
Dibër
Monika Kryemadhi
Korçë
Filloreta Kodra
Elbasan
Bujar Kllogjeri, Pëllumb Xhufi
Malësi e Madhe
Pjerin Ndrehu,
Shkodër
Esmeralda Uruçi
Kukës
Rexhep Ballmi
Lezhë
Viktor Tusha