Raporti i CIA-s: Shqipëria e 30-ta në botë për borxhin e madh publik

Shqipëria renditet e 30-ta në botë për borxhin më të madh publik në raport me prodhimin e brendshëm bruto, sipas një raporti të CIA-s amerikane. Raporti u referohet shifrave të vitit 2009 kur niveli i borxhit të përgjithshëm ndodhej në kuotën e 60 përqindëve. Ndërkohë që edhe në 2010-n do të kemi sërish rritje që financat e parashikojnë në 744 miliardë lekë ose 59.91 për qind në raport me prodhimin e brendshëm bruto, në rast se PBB-ja do të shënojë rritjen e planifikuar. Shërbimet për borxhin kanë ardhur duke u rritur sidomos në dy vitet e fundit, ku në vitin 2009 kemi paguar rreth 42 miliardë lekë për interesa dhe kredi. Për borxhin e brendshëm vitin e kaluar kemi paguar rreth 31.4 milionë lekë, kurse për të huajin afro 5 miliardë lekë. Shërbimet e borxhit në raport me Prodhimin e Brendshëm Bruto kanë qenë mesatarisht 3.3 për qind, ndërsa në 2009-n pësuan rritje në 3.6 për qind. Borxhi i jashtëm në fund të vitit 2009 krahasuar me 2008-n, vlerësohet në rritje, nga 32 për qind në 39 për qind në raport ndaj totalit, duke qenë kështu në përputhje me parashikimet e strategjisë 2009-2011.

13 Maj 2010