Reagim në Facebook i kryeministrit Berisha: “Qeveria e piktorit, ekipi më i korruptuar në historinë e Shqipërisë”

Berisha: Rama mblodhi “ansamblin lukunia” - ditë e shënuar në historinë e Kleptokracisë!

Kryeministri Sali Berisha komentoi dje takimin me dyer të mbyllura të Edi Ramës me kabinetin e tij qeveritar, duke e cilësuar këtë si “ansambli i lukunisë”. Në rrjetin social Facebook, Berisha thekson se, ekipi i ri i Edi Ramës, është më i korruptuari që ka mundur të instalohet ndonjëherë në vend, duke denoncuar dhe aferat në të cilat janë përfshirë Rama dhe Ministrat e rinj. Nga Edi Rama, Shkëlqim Cani, Arben Ahmetaj, Sajmir Tahiri, Ilir Beqja, Erjon Veliaj etj, përbëjnë lukuninë e korrupsionit. “Të dashur miq, sot Piktori mblodhi në zyrën e tij kabinetin e vet qeveritar që është dhe ekipi më i korruptuar që është instaluar ndonjëherë në Shqipëri. Vet Piktori, përveç aferave si ish ministër i qeverisë Nano dhe Kryetar 20% i bashkisë së Tiranës, është i vetmi kryeministër këto 20 vite në Europë që ulet në karrigen e kryeministrit me një vilë dhe një pallat 5 katesh me burim financiar të panjohur. Ministri i Financave Cani është guvernatori që pasi vodhi apo bashkëvodhi Thesarin e Shtetit dhe pas zhdukjes së tij deklaroi se Banka nuk ka patur në Thesar flori. Ministrit të Shëndetësisë Beqja është i vetmi që iu hoq mandati i deputetit sepse me baxhanakun e Piktorit kishte bërë kerdine me tenderë në bashki. Ai ka falsifikuar mijëra e mijëra pensione për të cilat po ndiqet. Ministri i Brendshëm Tahiri është i vetmi deputet me skaf dhe që iu arrestua i ati në flagrancë për kontrabandë ilaçesh dhe e ëma ndiqet për evazion fiskal në shumën 80 mijë euro. Ministri i Ekonomisë Ahmetaj është në ndjekje për vjedhjen prej 10 milion euro që i ka bërë kompanisë Albtelekom me kompaninë e tij private “Hermes”. Ministri i Mirëqenies Sociale, më mirë të themi i mirëqenies personale, Erion Veliaj është bërë i famshëm si njeriu që me paratë e Mjaftit ndërtoi një vilë për vete dhe një vilë për Velicen pa firmosur në jetën e tyre ndonjëherë në bordero. Ai më pas për të zhdukur gjurmët e kësaj afere vodhi vet kompjuterin e financave të Mjaft-it. Këto ishin vetëm disa nga aferat e disa prej anëtarëve të “ansamblit lukunia”! Këtij i thonë ndryshim! Përpara drejt Kleptokracisë!”- shkruan kryeministri Berisha në Facebook.
Edi Rama mblodhi dje në selinë e PS në një takim, ministrat e kabinetit të tij, ndërsa në të nuk morën pjesë pjesë 5 ministrat e zgjedhur nga radhët e LSI-së. Kështu në takim ishin në pranishëm, zv/Kryeministrin Niko Peleshi, ministrin e Financave Shkëlqim Cani, ministrin e Brendshëm Saimir Tahiri, ministren e Mbrojtjes Mimi Kodheli, ministrin e Jashtëm Ditmir Bushati, ministrin e Zhvillimit Ekonomik, Tregtisë dhe Sipërmarrjes Arben Ahmetaj, ministrin e Energjisë dhe Industrisë Damian Gjiknuri, ministren e Zhvillimit Urban dhe Turizmit Eglantina Gjermeni, ministri i Shëndetësisë Ilir Beqja, ministri i Arsimit dhe Sportit Lindita Nikolli, ministria e Mirëqenies Sociale dhe Rinisë Erjon Veliaj, ministrin për Inovacionin dhe Administratën Publike Milena Harito, ministrin për Çështjet Vendore, Blend Çuçi, ministrin për Marrëdhëniet me Parlamentin Ilirjan Celibashi.