Rohan: Ska BE pa e njohur Kosovën
Albert Rohan / Foto arkiv
Zv.ndërmjetësuesit në negociatat për statusin e Kosovës, Albert Rohan, ka thënë se Serbia nuk mund të bëhet anëtare e Bashkimit Evropian, pa e njohur paraprakisht shtetin e ri. Në një intervistë, ai ka theksuar se kjo është e qartë për të gjitha vendet e BE-së.
“Serbia nuk mund të bëhet anëtare e BE-së pa e njohur Kosovën. Ju nuk mund të bëheni anëtar i një klubi nëse nuk flisni me anëtarët e tjerë të atij klubi. Ky është një pozicion që mendoj se e kanë shumica e vendeve të Bashkimit Evropian”, ka theksuar Rohan.
Ai ka nënvizuar se normalizimi i marrëdhënieve të Serbisë me Kosovën nënkupton njohje reciproke.
“Sipas meje, kjo do të thotë njohje dhe asgjë tjetër. Pse Turqia ka aq shumë probleme tashti? Sepse nuk e ka njohur Republikën e Qipros si përfaqësuese të ishullit dhe të gjithë i thonë asaj se për sa kohë nuk e njeh Qipron, nuk do të ketë anëtarësim në BE. Kështu që këto janë principet e qarta që kam unë në mendje”, ka thënë zëvendësi i presidentit Ahtisaari.
Rohan ka folur edhe për çështjen e veriut, duke thënë se nuk duhet të ketë asnjë zgjidhje tjetër për atë pjesë, përveç asaj që parashihet me Planin e Ahtisaarit. / Kosova.com