Ronaldo drejt Katarit, por 7,5 kg mbi peshë

Pas skandalit me tre transvestitë, që e ka detyruar të mbyllet për ditë të tëra në shtëpi, më në fund Ronaldo mund të buzëqeshë. Gjithçka duket e harruar, edhe për faktin se e fejuara e tij, pret një fëmijë. Pas skandalit Maria Beatriz Antoni u kthye në shtëpinë e prindërve, duke pohuar në media se ishte ndarë nga sulmuesi i Milanit. Por, në çift u rivendos paqja, pasi sipas brazilianes "O Globo" Maria është shtatzënë. Qetësia në familje është shoqëruar edhe me lajme të mira për jetën profesionale. Dëmtimi i disa muajve më parë dukej se do t‘i jepte fund karrierës së njërit prej yjeve më të mëdhenj të Brazilit. Por, nëse Milani nuk preferon t‘i rinovojë kontratën, Ronaldo e ka gati alternativën. Sipas të njëjtës gazetë, për sulmuesin interesohen nga Katari, ku i kanë ofruar tre vjet kontratë dhe përfitime të mëdha financiare. Momentalisht, lojtari po rikuperohet nga operacioni në gjurin e majtë dhe shpreson që në tetor të jetë në formë optimale. Ndër të tjera "O Globo" zbuloi se në këtë periudhë pa aktivitet fizik, Ronaldo është 7,5 kg mbipeshë.