Rreh vajzën para fakultetit, pranga babait

DHUNA/ Një 47-vjeçar është vënë në pranga pas dhunës së ushtruar ndaj së bijës, studente 20-vjeçare

ELBASAN- Babai godet me mjete të forta në pjesë të ndryshme të trupit vajzën e tij 20-vjeçare, studente e vitit të parë në Fakultetin e Edukimit. Policia ka arrestuar në flagrancë shtetasin D.Mazhi, 47 vjeç, lindur dhe banues në lagjen "Vullnetari" të qytetit të Elbasanit. Ai akuzohet se ka goditur vajzën e tij me inicialet M.M. Kjo e fundit është dërguar në spital dhe pasi ka marrë qetësues në urgjencën e kirurgjisë është larguar në Qendrën e Mbrojtjes së Grave, ku edhe strehohej pasi ishte larguar nga shtëpia. Dyshohet se babai i saj ka qenë në gjendje të turbulluar si pasojë e alkoolit, por gjithsesi kjo ende nuk deklarohet zyrtarisht nga policia. Sherri mes babait dhe vajzës ka ardhur si pasojë e grindjeve të vazhdueshme mbi marrëdhënien më të fundit të vajzës dhe familjen e djalit me të cilin ajo ishte lidhur. Mësohet se jeta dashurore e vajzës ka qenë objekt i vazhdueshëm grindjesh deri në veprimet më të fundit të babait. Vajza është marrë në mbrojtje nga qendra, ndërkohë që babai do të përgjigjet për plagosje të lehtë të së bijës.