“Rritet konsumi: qershor-gusht, 43 miliardë lekë, 3.8% më shumë se parashikimi”

Flet zëvendësdrejtori i Përgjithshëm i Tatimeve, Besnik Nuredini

Zëvendësdrejtori i Përgjithshëm i Tatimeve, Besnik Nuredini ka deklaruar se në tre muaj, Drejtoria e Përgjithshme e Tatimeve ka arritur të mbledhë për arkën e shtetit 43 miliardë lekë. Në një prononcim për mediat, Zëvendësdrejtori Nuredini i është referuar periudhës qershor-gusht, të dhënat tregojnë një tejkalim të planit me 3.8 për qind. Sipas të ardhurave zyrtare nga Tatimet vihet re një rritje e të ardhurave, veçanërisht nga Tatimi i Vlerës së Shtuar. Vetëm për periudhën qershor-gusht, TVSH-ja është 28.6 per qind më tepër ose 1.9 miliardë lekë më shumë. Zëvendësdrejtori i Përgjithshëm i Tatimeve, Besnik Nuredini e faturon këtë sukses tek ecuria pozitive e bizneseve turistike.  Sipas zotit Nuredini, administrata Tatimore gjatë vitit 2012 është përqendruar në mbikëqyrjen e veçantë të bizneseve turistike dhe ato të telefonisë celulare. Periudha e verës ka sjellë rritje të konsumit në vend. Kjo dëshmohet në rritjen e të ardhurave nga TVSH-ja, që është edhe treguesi kryesor i konsumit në vend. Sikurse është theksuar edhe mënyrë të përsëritur nga Banka e Shqipërisë, të ardhurat nga TVSH-ja e për rrjedhojë edhe konsumi, qëndron në vend që prej disa muajsh. Por, duket se situata ka ndryshuar disi gjatë periudhës së verës, kur konsumi është rritur lehtë.