Rritet ne treg vlera e bonove te privatizimit

Perqindja e letrave me vlere, apo sic njihen ndryshe bono privatizimi, jane rritur keto ditet e fundit. Nga nje vezhgim i bere nje dite me pare ne tregun e lire valutor rezulton se ato kembehen deri ne 21 per qind, nderkohe qe pak muaj me pare ato kembeheshin vetem 3-4 per qind. Bonot e privatizimit u rikthyen ne treg me nje rritje te ndjeshme te vleres se tyre pas vendimit te qeverise se ato do te perdoren ne procesin e legalizimit te objekteve pa leje. Ne mesin e muajit qershor, Keshilli i Ministrave vendosi se qytetaret shqiptare qe do te legalizojne objektet pa leje do te kene te drejte qe 80 % te vleres se tyre ta paguajne me letra me vlere. Per qytetaret, te cilet e kane paguar vleren njeqind per qind, ne baze te vendimit te qeverise, do t'u rimbursohet 80 % e vleres te cilen ata do ta paguajne me letra me vlere. Ndersa siperfaqen jashteligjore, te cilen ligji e parashikon qe te paguhet me vleren e tregut, qytetaret do ta paguajne 50 per qind me letra me vlere dhe 50 per qind me para. Numri i pergjithshem i pasurive informale eshte rreth 350 000, me shtrirje ne nje siperfaqe prej 320 000 hektaresh ne shkalle vendi.