Ruli: Nga 2010-a, sërish rritje çmimit të energjisë

 Sipas ministrit të Ekonomisë, Genc Ruli, privatizimi i OSSH-së do të sjellë një edhe rritje të çmimit të energjisë, në një kohë që i vetmi ngushëllim për shqiptarët duket se do të jetë faktit që rritja e çmimit nuk do të fillojë që nga viti 2009, por më pas. Sipas tij, në 5 vitet në vazhdim çmimi i energjisë do të rritet gradualisht.

Vetëm katër kompani kanë mbetur në garë për blerjen e OSSH-së nga tetë që ishin fillimisht. Tërheqja e kompanive të tjera duket se ka ardhur për shkak të riskut në investim, pasi pronarët e rinj të OSSH-së do të detyrohen të përballen edhe me dy probleme të mëdha: vjedhjen e energjisë dhe humbjet e mëdha në rrjet. Me shitjen e OSSH-së, do të jetë pikërisht investitori privat që do të merret me blerjen e energjisë në tregun rajonal apo më gjerë me një çmim që do të variojë në varësi të kërkesës për energji.

Pritet që ditën e hënë të fillojë edhe tenderi për blerjen e 76 % të aksioneve të operatorit të sistemit të shpërndarjes, ku firmat që konkurrojnë për pronar të ri janë “Enel”, “EVN”, “ÇEZ” dhe “Energy Steiermark”. Afatet e privatizimit të operatorit të sistemit të shpërndarjes janë shtyrë 3 herë brenda muajit.