Rusia e “shtrëngon” Shqipërinë për borxhet

Pas Serbisë, është Rusia ajo që po e “shtrëngon” Shqipërinë që t’i paguajë borxhet e së kaluarës.

Kështu, mediat ruse në një artikull të posaçëm dedikuar kësaj çështje, përmendin marrëveshjen e miratuar së fundmi nga parlamenti shqiptar për kthimin e një pjese të borxhit që vendi ynë i detyrohet Rusisë.

Bëhet fjalë për shumën rreth 1 milionë dollarë, që Shqipërisë do t’i duhet të paguajë si këst të parë.

Kjo si pjesë e një borxhi të vjetër, i cili daton nga mesi i viteve të 60-ta, i trashëguara nga epoka sovjetike.

Ky borxh i vjetër i Shqipërisë, i njihet tashmë Rusisë, si një pasuese e Bashkimit Sovjetik dhe merret përsipër të paguhet gjatë viteve të ardhshme.

Në rast të mospagesës së shumës nga data 1 korrik, marrëveshja parashikon që norma e interesit të borxhit të jetë në nivelin prej 4 për qind.

Ndërkaq, mediat ruse shtojnë faktin se mungesa e borxheve mes dy shteteve tona, është një nga parakushtet për një marrëveshje të mundshme për furnizime me makineri dhe produkte teknike nga Rusia në Shqipëri.