SEEMO e OSBE dënojnë sulmin ndaj Matoshit

Organizata për Media e Evropës Juglindore (SEEMO), me seli në Vjenë, pjesë përbërëse e Institutit Ndërkombëtar të Shtypit (IPI), e dënon sulmin kundër gazetarit kosovar, Halil Matoshi.
 

Në një deklaratë për mediat, sekretari i përgjithshëm i SEEMO-s, Oliver Vujoviç i bën thirrje policisë të gjejë autorët e sulmit sa më shpejt që të jetë e mundur dhe t`i nxjerrë ata para drejtësisë”.
Po sot edhe përfaqësuesja për lirinë e mediave e OSBE-së, Dunja Mijatoviç, ka dënuar sulmin fizik ndaj gazetarit të Kohës Ditore, Halil Matoshi.

Në njoftimin e Organizatës për Siguri dhe Bashkëpunim në Evropë (OSBE), thuhet se Halil Matoshi është i njohur për raportimin e tij investigativ dhe kritikat ndaj politikanëve dhe zyrtarëve publikë.

“Ky sulm ka mund të jetë fatal për gazetarin. Unë jam e lumtur që Halil Matoshi, ia doli t`iu shmanget sulmuesve të tij”, tha Dunja Mijatoviç, dhe shtoi se “dhuna kundër gazetarëve është sulm kundër shprehjes së lirë dhe shoqërisë në tërësi dhe unë fuqishëm i dënoj të gjitha aktet e tilla”.
 

Matoshi u sulmua mbrëmjen e 10 korrikut nga tre persona të paidentifikuar, teksa po largohej nga një ngjarje kulturore në Prishtinë. Matoshi ia doli të largohet dhe më vonë është trajtuar në spital.