SHBA: Tërhiqet nga gara Huntsman, mbështet Romnin

Ish ambasadori amerikan në Kinë, Xhon Huntsman ka shpallur tërheqjen e tij nga gara për nominim presidencial të Partisë Republikane.

Në deklaratën e tij ai theksoi se mbështet kandidatin Mit Romni, ish guvernator i Masaçusetsit.

“Sot unë e pezulloj fushatën time për presidencë. Besoj se tash është koha për partinë tonë që të bashkohet rreth kandidatit, i pajisur më së miri për t’i shkaktuar disfatë Barak Obamës. Përkundër dallimeve tona, besoj se ky kandidat është guvernatori Mit Romni”, tha Huntsman.

Zoti Huntsman doli i treti në garën e fundit në Nju Hempshir, ndërsa gara e ardhshme e republikanëve mbahet më 21 janar në Karolinën Jugore.I nominuari republikan do të ballafaqohet me presidentin Barak Obama, në zgjedhjet presidenciale në nëntor të këtij viti.