SHBA, arrestohen 200 persona në protestë

Policia amerikane ka arrestuar në Manhatan rreth 200 persona gjatë protestës së Lëvizjes “Pushtimi i Wall Street-it”, e cila shënonte njëvjetorin e themelimit.
 

Protestuesit kanë bllokuar trafikun, ndërsa dhjetëra policë dhe furgonë janë rreshtuar në rrugë. Ata kanë brohoritur me zë të lartë dhe shumica e të arrestuarve akuzohen për prishje të qetësisë publike.
 

Lëvizja “Pushtimi i Wall Street-it” ka nisur aktivitetet më 17 shtator të vitit 2011, kur disa qindra aktivistë kanë okupuar një park në qarkun financiar të Manhatanit, për të kundërshtuar pabarazitë ekonomike.