Salihi shënon dhe humbet penallti

Hamdi Salihi i është kthyer golit me Riedin, këtë herë në ndeshjen e vlefshme për Kupën e Austrisë ndaj Pashingut. Ka qenë një ndeshje e lodhshme për sulmuesin, sepse pas përfundimit të kohës së rregullt në barazim 1 1, janë dashur shtesat dy herë nga 15 minuta, e më pas penalltitë, për të përcaktuar ekipin që do të kualifikohet. Shkodrani ka qenë protagonisti kryesor për ekipin e tij, teksa në minutën e 60 të barazoi rezultatin. Pas një pasimi të ardhur nga e majta, ai goditi tokazi brenda zonës dhe topi përfundoi në rrjetë. 24 vjeçari luajti 120 minuta, por pa mundur të shënojë në kohën shtesë. Ndeshja shkoi tek 11 metërshat dhe kur rezultati i këtyre të fundit ishte 3 2 për Riedin, Salihi kishte të drejtën e goditjes. Topi i gjuajtur prej tij u prit nga portieri, por kjo nuk ndikoi, pasi me rezultatin përfundimtar 4 2, Riedi u kualifikua për në turin tjetër. Pas aktivizimit me kombëtaren në dy ndeshjet eliminatore, Hamdi Salihi përsëri shënoi për Riedin, gjë që kishte bërë edhe para se të grumbullohej me kuqezinjtë.