Sandri në telashe nga muaji i RamazanitNga Antena brenda familjesSandri dje nuk dinte nga ta fillonte. Fillimi i festës së Ramazanit ia komplikon gjithmonë punët. Ndjehet shumë i mërzitur që së paku këtë radhë nuk ka qëlluar mysliman. Mori Qukapin në

Nëse dëshironi të lexoni edicionin online të gazetës në PDF klikoni këtu.

Sandri dje nuk dinte nga ta fillonte. Fillimi i festës së Ramazanit ia komplikon gjithmonë punët. Ndjehet shumë i mërzitur që së paku këtë radhë nuk ka qëlluar mysliman. Mori Qukapin në telefon ta pyeste si iu duk mbrojtja që i kishte bërë në gazetë. Qukapi ia mbylli dhe i dërgoi mesazh: “Jam me Zenin se fillon Ramazani.”

- Ah si nuk godita dhe unë mysliman këtë vit, - tha Sandri me vete. - I thonë gati një muaj që mund të humbas kontaktet. Ky Fevziu dhe në këtë pikë është me fat, - tha.

E pyeti një herë se ç’kuptim ka Ramazani.

- Është muaj sakrifice Sandër, - tha Fevziu. - Duhet të demonstrosh devotshmëri për të të falur mëkatet. Ma ka shpjeguar një herë Alia Izetbegoviç, kur e kam pas takuar më ‘95, po s’e mbaj mend mirë. Por në parim, sa më shumë mëkate të kesh gjatë vitit, aq më i përkushtuar duhet të jesh.

- Pse s’thua ti që s’kam për ta takuar Zenin asgjëkundi këtë muaj, - tha. - Më merr dhe atë Qukapin me vete dhe na ngeli kjo tokë e Dajtit. I thonë 150 hektarë dhe vetëm ne e kemi me vendim fakti. Doktori ua fshiu të gjithëve, vetëm ne na e dha bashkë me leje. Po nuk veproi Qukapi shpejt, na mori lumi.

- Nuk e di Sandër, se unë këtë muaj duhet të bëj disa udhëtime në Bruksel, Romë dhe Paris, të siguroj ca intervista, t’i kemi rezervë.

- Ti je në rregull vëlla, po s’i t’ia bëj unë këtij Ramazanit që qenka dhe i gjatë.

- S’di ç’të them. Po merru me doktorin se nuk mban Ramazan. Vetëm familja mban. Ai është i pastër dhe nuk pretendon se ka mëkate për të larë. E thotë gjithmonë, “kush e ndjen që ka mëkate, le të mbajë”. Dhe vajza me djalin mbajnë më shumë.

- Puna është se mua ata të dy më duhen, se me atë të madhin s’mbaron dot punë direkt. S’di a mban ky Qukapi që ka bërë prefekt. Po shkoj njëherë nga “Fiesta” se më thanë që atje e mbajnë vulën e prefekturës tani, mos i marr ndonjë vulë.

Pastaj Sandri u kujtua që dhe Ilir Meta mund të mbajë Ramazan. E mori në telefon.

- Ku je mo figurë, a mban Ramazan ti apo jo?

- Po jo mo flori, unë jam bektashi. Ne na lejohet të pimë dhallë, qumësht, nuk e kemi kaq të fortë si këta.

- E paskeni mirë ju vëlla. E paskeni fe të qendrës si LSI që bën koalicion dhe me PS, dhe me PD.

- Epo ç’të bëjmë o flori. Nga nevoja e kemi shpikur dhe këtë fe, ndaj e kemi caktuar selinë në Mal të Tomorit. Ja këtë javë kemi dhe pelegrinazhin.

- Po mëkatet u falen ju bektashinjve këtë muaj? - pyeti Sandri.

- Ne s’kemi mëkate, - tha Meta. - Ata që kanë, në daç t’ua falë Zoti, në daç jo. Ne e kemi thënë që kishim një plan, e realizuam planin, hymë në qeveri. Po ti ç’ke që je kaq i shqetësuar?

- Po ja mo burrë, kemi gjithë këto punë, por këta të familjes që të mbarojnë ndonjë punë mbakan të gjithë Ramazan. As i fton dot në kafe, as bën dot muhabet se u falkan gjithë ditën. Doktori që s’ka mëkate, nuk falet, po me atë nuk flitet këtë muaj.

- ǒtë të them o Sandër, këto halle i kemi pas të gjithë, ndaj kemi zgjedhur fe të mesme, jo shumë fanatike. Tani të zuri halli, prit një muaj.

- Ti q.. robt dhe kësaj feste, shkon e bie në muajin më vendimtar. I fut dhe doktori një agjërim për gjithë ministrat dhe deputetët të mos kenë makina e shoferë dhe ka për të na lënë të agjërojmë gjatë.