Sarkozi dhe Kameron vizitojnë Libinë

Presidenti francez, Nikolas Sarkozi, dhe kryeministri britanik, Dejvid Kameron, do të vizitojnë sot Libinë.

Dy zyrtarët kanë qenë mbështetës të fuqishëm të bombardimeve të NATO-s, të cilat kanë ndihmuar përmbysjen e Muamer Gadafit pas 42 vjetësh në pushtet.

Sarkozi dhe Kameron do të qëndrojnë në Tripoli dhe Bengazi, ku do të takohen me liderët e përkohshëm libianë.

Në prag të vizitës së tyre, Këshilli Kombëtar i Tranzicionit ka parashikuar më shumë luftime kundër besnikëve të Gadafit, të cilët refuzojnë të dorëzohen.

Gadafi, vendndodhja e të cilit mbetet e panjohur, i ka bërë thirrje Këshillit të Sigurimit të Kombeve të Bashkuara, të mbrojë vendlindjen e tij Sirte, e cila vazhdon të kontrollohet nga besnikët e tij.

Bashkimi Evropian u ka kërkuar të dyja palëve të ndalojnë vrasjet dhe arrestimet arbitrare.