Sarkozy viziton Kosovën këtë vit

Paris -Brenda këtij viti, presidenti francez Nicola Sarkozy do të vizitojë Kosovën. Ftesa i është bërë nga kryeministri i Kosovës, Hashim Thaçi, i cili zhvilloi një takim gjatë së hënës me kreun e Elizesë. Zëdhënësi i qeverisë së Kosovës, Memli Krasniqi duke folur për BBC-në nga Parisi tha se gjatë takimit me zotin Thaçi, presidenti Sarkozy ka thënë se Franca do të jetë e angazhuar plotësisht përkrah Kosovës dhe do ta ndihmojë shtetin e ri në të gjitha aspektet.

Ai ka bërë të ditur se me ftesë të qeverisë së Kosovës, presidenti francez, Nicolas Sarkozy do ta vizitojë Prishtinën këtë vit."Është biseduar për të arriturat e Kosovës në pak më shumë se një vit pavarësi, poashtu është konfirmuar vazhdimi i mbështetjes së fuqishme të Francës për Kosovën në të gjitha aspektet, qoftë në zhvillimin ekonomik apo në procesin tepër të rëndësishëm të njohjeve diplomatike," tha zoti Krasniqi.