Selitë, konflikt për muret rrethuese të vilave

 
Banorët kanë kundërshtuar aksionin për prishjen e mureve rrethuese, për projektin e rrugës
 
TIRANË- Banorët e Selitës kanë bllokuar dje një aksion të Policisë Bashkiake, duke kundërshtuar prishjen e mureve rrethuese. Pasditen e djeshme, forcat e policisë bashkiake dhe ato të inspektoriatit të ndërtimin kanë shkuar për të zbatuar një vendim për prishjen e mureve të ndërtuara për rrethimin e shtëpive, por kanë hasur në kundërshtimin e banorëve. Këta të fundit, duke pretenduar se ndërtimet i kanë bërë me leje kanë kërkuar më së pari të shpronësohen, e më pas të lejojnë ndërtimin e rrugës. Pak kohë më parë, Inspektoriati i Ndërtimit u ka bërë thirrje banorëve të heqin muret, pasi aty do të ndërtohet një rrugë rreth 11 metra e gjerë. Banorët e Selitës, të prekur nga ky projekt, jo vetëm që nuk janë bindur, por kanë kundërshtuar dje aksionin e Policisë Bashkiake. "Ne kërkojmë më parë të bëhet shpronësimi, e më pas të prishen muret",-kanë pohuar banorët, ndërsa pretendojnë se ndërtimi është bërë në përputhje me ligjet. Sipas Inspektoriatit të Ndërtimit, banorët i kanë ndërtuar këto mure rrethuese pa leje, ndaj edhe nuk duhet të pengojnë projektin e ndërtimit të rrugës. Tashmë priten hapat e tjera që do të ndërmerren, për të zgjidhur këtë konflikt mes banorëve dhe Inspektoriatit të Ndërtimit, për t'i hapur më pas dritën jeshile ndërtimit të rrugës.