Serbet protestojne para gjykates ne veri te Mitrovices

Serbet e Kosoves kane protestuar dje para nderteses se Gjykates se Qarkut ne veri te Mitrovices, duke kerkuar kthimin e gjykatesve dhe prokuroreve serbe ne ndertese, para se aty te fillojne punen zyrtaret e EULEX-it. UNMIK-u thote se mbase do ta le Gjykaten ne pergjegjesi te EULEX-it me 15 janar. Qeveria e Kosoves eshte optimiste se shume shpejt do ta fuse ne sistemin kosovar te drejtesise edhe kete gjykate. Njeri nga perfaqesuesit e punetoreve serbe, gjykatesi Nikolla Kabashic, ka deklaruar se ende nuk eshte filluar me fazen e dyte, e cila do te nenkuptonte fillimin e punes per gjykatesit dhe prokuroret serbe. "Faza e dyte eshte dashur te nise me 3 dhjetor. Ne kete faze eshte dashur te perfshihen gjykatesit dhe prokuroret serbe qe jetojne ne veri, pra ne kater komunat veriore, natyrisht duke respektuar disa kushte", tha Kabashic. Sipas tij, UNMIK-u po mundohet te bleje kohe, derisa te vije EULEX-i. "Nuk pajtohemi me UNMIK-un, i cili na ka njoftuar se ata do te terhiqen plotesisht nga kjo ndertese me 15 janar, kur ne kete ndertese te hyjne gjykatesit dhe prokuroret e EULEX-it", tha ai. Gjykata ne veri eshte bere molle sherri qe nga shpallja e pavaresise se Kosoves. Ndersa, situata eshte perkeqesuar ne muajin mars, kur UNMIK-u dhe KFOR-i kishin nderhyre per te liruar gjykaten nga okupimi qe i bene ish-punetoret serbe. Trazirat paten lene te vdekur nje polic ukrainas dhe shume te lenduar ne mesin e forcave nderkombetare. Me 3 tetor, gjykatesit dhe prokuroret e UNMIK-ut kane rifilluar punen ne gjykate.