Seseri: “Shteti antiligjor i fadromave po shpronëson shtëpitë e banorëve të Thumanës”

Deputetja e Partisë Socialiste, Rudina Seseri, ka reaguar dje ndaj përleshjes së Policisë Ndërtimore me 12 familje në komunën e Thumanës. Me këtë akt, sipas Seserit, është treguar se është shteti antiligjor i fadromave. Seseri tha se qeveria i mashtroi këta banorë duke shpronësuar shtëpitë e tyre me një çmim qesharak, poshtë nivelit të tregut. “Banorët e Thumanës kanë nisur një proces gjyqësor në të drejtën e tyre për një rivlerësim të pronës dhe pasurisë së tyre. Por shteti antiligjor i fadromave nuk pret as vendimin e gjyqit dhe çfarë është me cinikja, nuk pret që banorët e varfër të kësaj zone të arrijnë të marrin të paktën tullat e shtëpive të tyre të nënvleftësuara”, - pohoi ajo. Ndër të tjera, përfaqësuesja e PS-së deklaroi se duke përdorur instrumente të verbra si Policia Ndërtimore, pas rrënimit ekonomik të banorëve të kësaj zone, kjo qeveri vendos t’i rrënojë ata edhe fizikisht.

17 Prill 2010