Sfida e Mijëvjeçarit – Shqipëria, pranë kualifikimit për një marrëveshje afatgjatë asistence

“Millennium Challenge Corporation” ka shpallur mbrëmë vlerësimet për vendet që përfitojnë nga programet e ndihmës, duke e klasifikuar qeverinë e Tiranës, si një aksionere kryesore në reformat që do të mundësojnë një marrëveshje shumëmilionëshe për luftën kundër korrupsionit

Koorporata “Sfida e Mijëvjeçarit” (Millennium Challenge Corporation) shpalli vlerësimet për të gjitha vendet të cilat përfitojnë nga programet e ndihmës së kësaj korporate. Korporata Sfida e Mijëvjeçarit (Millennium Challenge Corporation) kualifikon për herë të parë Shqipërinë mbi mesataren e të gjitha vendeve të cilat përfitojnë nga kjo koorporatë, në luftën kundër korrupsionit. Në klasifikimin e hartuar nga Korporata Sfida e Mijëvjeçarit (Scorecard 2010), klasifikim ky i përvitshëm, në indikatorët mbi Kontrollin e Korrupsionit, Shqipëria për herë të parë renditet me 53 përqind, mbi vijën mesatare të përcaktuar nga Korporata, si një indikator thelbësor për politika efikase të qeverisë në luftën kundër korrupsionit në vend. Vendet përfituese të programeve të ndihmës nga Korporata e Sfidës së Mijëvjeçarit vlerësohen për nivelin e korrupsionit në qeverisjen e të gjitha niveleve, efektin e korrupsionit në të bërit biznes, frekuencën e “ryshfeteve” në kontratat publike, taksat, vendimet gjyqësore etj, nepotizmin në shërbimin civil, vendosmërinë dhe forcën e ligjeve, politikave të qeverisë kundër korrupsionit, besimin e publikut në ndershmërinë e institucioneve financiare dhe tek politika, transparencën dhe mekanizmat e duhura për të luftuar korrupsionin dhe garantuar konkurrencë në biznes, të drejtën e informacionit të qytetarëve rreth aktivitetit të qeverisë si dhe shumë aspekte të tjera të rëndësishme në drejtim të luftës kundër korrupsionit. Ky aspekt i rëndësishëm i klasifikimit vjetor të Korporatës së Sfidës së Mijëvjeçarit shihet si i domosdoshëm dhe i bashkangjitur me rritjen ekonomike dhe reduktimin e varfërisë, duke qenë se korrupsioni cenon rritjen ekonomike të një vendi duke rritur kostot, ulur produktivitetin, dekurajuar investimet, ulur besimin e qytetarëve në institucionet publike etj. Klasifikimi “Scorecard” shërben, përmes të dhënave mbi 17 indikatorë, për të përcaktuar përzgjedhshmërinë e secilit vend për përfitimin nga programet e asistencës. Një arritje kaq pozitive, për të parën herë për Shqipërinë, në koeficientet e Scorecard 2010 në Kontrollin e Korrupsionit, e afrojnë Shqipërinë me pjesën e mëtejshme të asistencës së Korporatës së Sfidës së Mijëvjeçarit, fazën “Compact” e cila është një marrëveshje disavjeçare mes Korportatës së Sfidës së Mijëvjeçarit dhe vendeve të përzgjedhura në bazë të arritjeve të tyre në disa fusha duke financuar programe specifike për uljen e varfërisë dhe stimulimin e rritjes ekonomike. Korporata e Sfidës së Mijëvjeçarit (The Millennium Challenge Corporation) është një agjenci e Shteteve të Bashkuara të Amerikës, e krijuar nga Kongresi i Shteteve të Bashkuara të Amerikës, e cila  përkrah me fonde dhe asiston vende të ndryshme në politikat e qeverisjes së mirë, lirinë ekonomike dhe investimet. Shqipëria është një nga vendet përfituese të programit “Prag” të Sfidës së Mijëvjeçarit. Pas projekteve të One Stop Shop për Regjistrimin e Biznesit, Sistemit Elektronik të Taksave dhe mbështetjen në përmirësimin në fushën e Prokurimeve Publike, Shqipëria si rrjedhim i një performance shumë të mirë, ishte vend përfitues dhe i fazës së dytë të programit “Prag” me asistencë të mëtejshme në administratën tatimore, One Stop Shop për lejet dhe licencat si dhe në ngritjen dhe fuqizimin e Task-Force për Antikorrupsionin.